Björk Guðmundsdóttir tónlistarmaður hefur sent frá sér ávarp til íslensku þjóðarinnar á Facebook, þar sem hún útskýrir notkun sína á orðinu „rednecks“ í viðtölum við erlenda fjölmiðla, en þar vísaði hún til Sigmundar Davíðs Gunnlaugssonar forsætisráðherra og Bjarna Benediktssonar fjármálaráðherra.
Hún er nýkomin úr sumarbústað og missti því af umræðunni um orð hennar, þar sem Jón Gunnarsson alþingismaður sagði meðal annars að hún væri „dauf til augnanna“.
„Eru sannfærðir að þeir geti lifað án heildarinnar og oft hlynntir vopnaburði.“
„Mig langar aðeins að ræða þýðinguna á orðinu „redneck“ í íslenskum fjölmiðlum sem ég notaði í viðtölum við Rolling stone, Sky news og fleiri í síðustu viku. Í mínum haus er þetta orð yfir fólk sem sér sinn þjóðflokk betri en aðra. Eru sannfærðir að þeir geti lifað án heildarinnar og oft hlynntir vopnaburði. Finnast þeir æðri náttúrunni og að þeir eigi að stjórna henni.
Fyrir mig hefur þetta orð aldrei tengst strjálbýli neitt endilega, redneks eru alls staðar í öllum löndum,“ skrifar hún.
Í íslenskum fréttamiðlum var orðið „redneck“ þýtt sem sveitalubbar. Birkir Jón Jónsson, oddviti Framsóknarflokksins í Kópavogi, kvartaði meðal annars undan orðnotkun Bjarkar.
„Bændur hafa um árhundruð verið gæslumenn landsins. Ég þekki ekki meiri náttúruverndarsinna, fólk sem elskar landið sitt og ber hag þess fyrir brjósti. Fólk úr sveit hefur oft verið kallað sveitalubbar af fólki sem finnst þau hallærisleg. Ég er stoltur sveitalubbi!“ skrifaði Birkir Jón.
Björk segir hins vegar að „rednecks“ fyrirfinnist ekki einungis í sveitum. „Fyrir mig hefur þetta orð aldrei tengst strjálbýli neitt endilega, rednecks eru alls staðar í öllum löndum og bara svo það sé alveg á hreinu: Ég elska af öllu hjarta Ísland og sérstaklega náttúruna og strjálbýlið.“
Björk var að ræða vernd hálendisins í viðtali við Sky news þegar hún lét orðin falla. „Meira en 80% Íslendinga finnst að hálendið eigi að vera ósnert og vilja þjóðgarð. Það er minnihluti „redneck“ stjórnmálamanna sem vilja eyða hálendinu - sérstaklega forsætisráðherrann og fjármálaráðherrann.“
Athugasemdir