Óli Björn Kárason, for­maður efna­hags- og við­skipta­nefndar Alþingis, greindi ekki frá því að eig­in­kona hans væri fram­kvæmd­ar­stjóri eigna­stýr­ingar hjá Arion banka þegar nefndin fund­aði með banka­stjóra Arion banka og yfir­manni eig­in­konu hans mið­viku­dag­inn 22. mars vegna söl­unnar á hlut í bank­anum til vog­un­ar­sjóða. Stundin greindi frá tengslum nefnd­ar­for­manns­ins við bank­ann tveimur dögum síðar og bað þá Óli Björn nefnd­ar­menn afsök­unar á að hafa ekki gert grein fyrir tengsl­unum fyrr. 

Í siða­reglum Alþing­is­manna, sem sam­þykktar voru í formi þings­á­lykt­unar í fyrra, er sér­stak­lega kveðið á um að þing­menn skuli forð­ast hags­muna­á­rekstra. „Þingmenn skulu við störf sín forð­ast árekstra milli almanna­hags­muna ann­ars vegar og fjár­hags­legra eða ann­arra per­sónu­legra hags­muna sinna eða fjöl­skyldu sinnar hins vegar. Takist þing­manni ekki að koma í veg fyrir hags­muna­á­rekstra af þessu tagi skal hann upp­lýsa um þá,“ segir í regl­unum auk þess sem fram kemur að þing­menn skuli „vekja athygli á per­sónu­legum hags­munum sínum sem máli skipta við með­ferð þing­mála.“ 

Óli Björn hefur ítrekað tjáð sig um mál­efni Arion banka og lýst þeirri skoðun sinni að kaup vog­un­ar­sjóða á þriðj­ungs­hlut í bank­anum séu af hinu góða. Þá hefur hann varið það að bank­inn sé kom­inn í ógegn­sætt eign­ar­hald í gegnum skatta­skjól og bent á að það sé „í sjálfu sér ekki ólög­legt að tengj­ast Cayman-eyjum“. Auk þess hefur hann átt sam­tal við Höskuld Ólafsson banka­stjóra sem for­maður efna­hags- og við­skipta­nefndar og boðað hann á fund nefnd­ar­innar. Eig­in­kona Óla Björns, Margrét Sveins­dóttir, er einn af æðstu stjórn­endum bank­ans, fram­kvæmda­stjóri eigna­stýr­ingar hjá bank­anum og hluti af sér­stakri fram­kvæmda­stjórn hans ásamt Höskuldi Ólafs­syni banka­stjóra.