Árni Johnsen, fyrrverandi þingmaður Sjálfstæðisflokksins og frambjóðandi í prófkjöri flokksins á Suðurlandi, gerir lítið úr Pírötum í grein í Morgunblaðinu í dag, kallar þá „leikfélaga“ og segir þá „ekki standa fyrir neitt“. Þá segir hann þá ekki hafa verkvit og að engin verðmæti séu á bakvið þá.

Píratar hafa undanfarnar vikur mælst með 24-30% fylgi í könnunum, um eða fyrir ofan fylgi Sjálfstæðisflokksins.

„Píratar standa ekki fyrir neitt og ef þeir komast í stjórnunarstöður ætla þeir að gera eitthvað. Gera eitthvað. Hvaða vitleysa er þetta?“ skrifar Árni. Stefna Pírata er birt á vef flokksins hér og er þar að sjá yfirlit yfir einstök stefnumál. 

„Verðmætin á bak við Pírata sem stjórnmálaafl eru því miður engin, þeir eru góðir spjallarar, lausir og liðugir og hafa áhuga á tölvutengingum, en pólitísk stefna þeirra er efnisminni en nýju fötin keisarans,“ segir Árni ennfremur.

Grein ÁrnaÁrni segir að það þurfi burð, myndugleika, markmið, fylgni, þolinmæði og þrautseigju til að stjórna landi, en Píratar hafi ekki þá eiginleika sem til þurfi.

Mynd: Morgunblaðið

Árni tilkynnti í grein í Morgunblaðinu í síðasta mánuði að hann myndi bjóða sig fram í prófkjöri Sjálfstæðisflokksins sem fer fram um næstu helgi. Hann var þingmaður flokksins frá 1983 til 1987, frá 1991 til 2001 og frá 2007 til 2013.

Árið 2003 var Árni Johnsen dæmdur í tveggja ára fangelsi fyrir mútuþægni, fjárdrátt og umboðssvik í opinberu starfi og rangar skýrslur til yfirvalda. Dóminn má lesa hér. 

Grein Árna er eftirfarandi:

Píratar í nýju fötum keisarans

Svo vel þykist ég þekkja þjóð mína að hún mun ekki veita Pírötum það brautargengi sem hún hefur gert í skoðanakönnunum undanfarin misseri. Ástæðan er einföld þegar á reynir. Píratar standa ekki fyrir neitt og ef þeir komast í stjórnunarstöður ætla þeir að gera eitthvað. Gera eitthvað. Hvaða vitleysa er þetta?

Píratar virðast hafa litla reynslu og lítið verkvit, stundum tefla þeir fram brjóstviti sem virðist slasað. Grundvöllurinn fyrir sjálfstæði og stjórn sjálfstæðrar þjóðar er stefna, markmið, metnaður - jafnvægi í hlutum, fjármálum sem framkvæmdum miðað við það sem þjóðin hefur úr að spila. Þar reynir á seiglu og þol því fátt er einfalt. Við Íslendingar höfum yndi af sérstæðum persónuleikum og það er fullt af þeim í safni Pírata. Á einum fundi þeirra hafði einn á orði að þeir yrðu að gera eitthvað sniðugt. Eftir stundarþögn sagði annar: Fríar tannviðgerðir. Frábært, sagði leiðtoginn. Hver á að borga 11 milljarða kostnað? spurði annar. Útgerðin, svaraði leiðtoginn, ekkert mál.

Maður spyr í hvaða veröld þetta blessað fólk lifir. Kannski einhverju eins og Bakkabræður sem fengu sér kött, en vissu ekki hvað hann æti. Bóndinn á næsta bæ sagði þeim að kötturinn æti allt. Þá fóru þeir heim og drápu köttinn svo hann æti þá ekki sjálfa.

„Þeir eru góðir spjallarar, lausir og liðugir og hafa áhuga á tölvutengingum“

Verðmætin á bak við Pírata sem stjórnmálaafl eru því miður engin, þeir eru góðir spjallarar, lausir og liðugir og hafa áhuga á tölvutengingum, en pólitísk stefna þeirra er efnisminni en nýju fötin keisarans.

Það þarf burð, myndugleika, markmið og fylgni, þolinmæði og þrautseigju til þess að stjórna landi okkar. Andstæðan við Pírata er til dæmis Sigurður Ingi Jóhannsson forsætisráðherra sem hefur leyst hlutverk sitt frábærlega vel og áttar sig á því hvað það skiptir miklu máli að hafa tón sem getur skapað þjóðarsátt um leiðir og lausnir.

Nei, kæru landar, hættum að æra óstöðuga, minnkum að hampa Pírötum þannig að sumir fréttamenn góna upp í þá eins og naut á nývirki og halda að þeir séu að höndla sannleikann og hamingjuna einu sönnu og fólk getur algjörlega ruglast í ríminu.