Rauði krossinn á Íslandi harmar hvernig staðið var að brottflutningi þungaðrar albanskrar konu úr landi í gær. Meðferð íslenskra yfirvalda á konunni hafi ekki verið í samræmi við við markmið laga um útlendinga er lúta á mannúðlegri meðferð stjórnvalda. Brottflutningur hefði ekki átt að eiga sér stað í ljósi aðstæðna.

Í tilkynningu sem Rauði krossinn hefur sent frá sér vegna brottvikningar konunnar, sem gengin var nærri 36 vikur á leið, ásamt manni sínum og tveggja ára syni, er harmað að ekki hafi verið staldrað við í framkvæmd brottvísunarinnar. Konan hafi verið í áhættuhópi vegna fyrri meðgöngu, í viðkvæmri stöðu sem umsækjandi um alþjóðlega vernd, brottvísunin hafi verið í andstöðu við ráðleggingar heilsugæslu höfuðborgarsvæðisins um að þungaðar konur í áhættuhópi fari ekki í flug eftir 32. viku meðgöngu og jafnframt í andstöðu við nýtt læknisvottorð þar sem ekki var mælt með flutningi.

„Með hliðsjón af aðstæðum í þessu máli hefði flutningur ekki átt að fara fram á þessum tímapunkti svo lífi og móður barns væri ekki stefnt í hættu“

„Brottvísun er þvingunarúrræði sem getur valdið mikilli streitu og kvíða. Streita á móður getur haft alvarlegar og óafturkræfar afleiðingar fyrir hana og ófætt barn hennar,“ segir í tilkynningunni. Þá segir að samkvæmt 2. grein laga um útlendinga sé markmið laganna meðal annars að tryggja mannúðlega meðferð stjórnvalda í málefnum útlendinga. „Meðferð á fjölskyldunni var að mati Rauða krossins ekki í samræmi við markmið laganna um mannúð, burtséð frá því hvort verklag sem þetta hafi verið viðhaft áður og Útlendingastofnun telji sig hafa farið eftir öllum reglum eins og fram kom í máli setts forstjóra stofnunarinnar í Kastljósi í gær. Með hliðsjón af aðstæðum í þessu máli hefði flutningur ekki átt að fara fram á þessum tímapunkti svo lífi og móður barns væri ekki stefnt í hættu.“

Rauði krossinn segir jafnframt að ekki sé forsvaranlegt að túlkun Útlendingastofnunar eða ríkislögreglustjóra geti ráðið úrslitum um hvort brottflutningur fari fram eða ekki, þegar heilbrigðisgögn taki ekki af öll tvímæli um ástand eða séu ekki nógu skýr. Því verði að laga verklag, hvort sem er hjá Útlendingastofnun, ríkislögreglustjóra eða innan heilbrigðiskerfisins, þegar um svo viðkvæman hóp sem fólk sem sótt hefur hér um alþjóðlega vernd er að ræða. „Brotalöm í kerfinu varðar líf og heilsu einstaklinga. Á bakvið tölur er raunverulegt fólk eins og skýrt sást í fjölmiðlum í gær.“