Samkeppniseftirlitið telur ný frumvarpsdrög til breytinga á samkeppniseftirliti valda miklum vonbrigðum þar sem í þeim sé lögð til veruleg veiking á samkeppnislögum sem rýra munu kjör almennings. Þórdís Kolbrún Reykfjörð Gylfadóttir, iðnaðar- og nýsköpunarráðherra, hefur boðað frumvarpið til þess að einfalda regluverk.

Þetta kemur fram í tilkynningu frá stofnuninni í dag. Samkeppniseftirlitið mun mæla eindregið gegn því að frumvarpið verði að lögum. „Það er alvarlegt að með frumvarpinu er lagt til að felld verði niður heimild Samkeppniseftirlitsins til málskots til dómstóla til að verja hagsmuni almennings og fyrirtækja sem mátt hafa þolað skaðlegar samkeppnishindranir,“ segir í tilkynningunni. „Þannig verður Samkeppniseftirlitinu gert ókleift að tryggja að hagsmunir þessara aðila fái fullnaðarúrlausn fyrir dómstólum.“

Einfalda regluverkiðKristján Þór Júlíusson, sjávarútvegs- og landbúnaðarráðherra, hefur ásamt Þórdísi Kolbrúnu Reykfjörð Gylfadóttur, iðnaðar- og nýsköpunarráðherra, í hyggju að einfalda regluverk með því að afnema yfir eitt þúsund reglugerðir.

Mynd: Stjórnarráðið

Þá segir Samkeppniseftirlitið að frumvarpið muni styrkja stór fyrirtæki á kostnað smærri aðila. „Stór fyrirtæki sem eru ósátt við úrskurði áfrýjunarnefndar samkeppnismála geta borið þá undir héraðsdóm, Landsrétt og eftir atvikum Hæstarétt. Verði frumvarpið að lögum mun hins vegar engin gæslumaður almannahagsmuna geta borið úrskurði nefndarinnar undir dómstóla. Verður þá skapað kerfi þar sem hagsmunagæsla öflugra fyrirtækja nýtur að þessu leyti forgangs og yfirburða gagnvart hagsmunum neytenda og smærri fyrirtækja.“

„Verður þá skapað kerfi þar sem hagsmunagæsla öflugra fyrirtækja nýtur að þessu leyti forgangs“

Þá telur stofnunin mikið áhyggjuefni að lagt sé til að lögð verði niður heimild Samkeppniseftirlitsins til að grípa til íhlutunar vegna tiltekinna skaðlegra samkeppnisaðstæðna. Sú heimild geri eftirlitinu kleift að koma í veg fyrir að fyrirtæki sitji óáreitt að einokunarhagnaði almenningi til tjóns.

„Þá er líka ljóst að frumvarpið er í beinu ósamræmi við aðgerðir á vettvangi ráðuneytisins, í samstarfi við OECD, sem miðar að því að draga úr samkeppnishindrunum, þar á meðal reglubyrði, sem stafar af lögum og reglum,“ segir að lokum. „Sú vinna miðar að því að efla samkeppni, almenningi til hagsbóta, á meðan tillögur í frumvarpinu hafa í veigamiklum atriðum þveröfug áhrif, það er veikja samkeppnislögin og draga úr möguleikum Samkeppniseftirlitsins til að stuðla að aukinni samkeppni.“

Þórdís Kolbrún Reykfjörð Gylfadóttir, atvinnuvega- og nýsköpunarráðherra, stendur að frumvarpinu. Lagðar eru til breytingar á framkvæmd undanþága frá samkeppnislögum þess efnis að fyrirtæki meti sjálf hvort skilyrði undanþága séu uppfyllt í samræmi við framkvæmd annars staðar á EES-svæðinu. Lagt er til að heimildir Samkeppniseftirlitsins til íhlutunar án brots og til að skjóta úrskurðum áfrýjunarnefndar samkeppnismála til dómstóla verði felldar brott, lagt er til að forstjóri stofnunarinnar verði skipaður tímabundið til 5 ára í senn og að aðeins verði heimilt að skipa sama manninn tvisvar í embætti.