Bergþór gerður að nefndarformanni með tveimur atkvæðum – Fulltrúar annarra flokka sátu hjá

Bergþór Ólason, þing­maður Mið­flokks­ins, er orð­inn for­maður umhverfis- og sam­göngu­nefndar Alþingis eftir að full­trúar ann­arra flokka en Mið­flokks­ins kusu að sitja hjá í atkvæða­greiðslu um for­mennsk­una. Frétta­blaðið greindi fyrst miðla frá þessu nú fyrir stundu.

Tæpt ár er liðið síðan Stundin og DV birtu upp­tökur af sví­virð­ingum sem Bergþór lét frá sér í drykkju­sam­sæti með fleiri þing­mönnum á veit­inga­staðnum Klaustri. Á meðal þess sem Bergþór sagði var að Inga Sæland, for­maður Flokks fólks­ins, væri „húrr­andi klikkuð kunta“, að Íris Róberts­dóttir, bæj­ar­stjóri í Vest­manna­eyjum væri „miklu minna hot í ár en hún var bara fyrir tveimur árum“, að Albertína Elí­as­dóttir, þing­kona Sam­fylk­ing­ar­innar hefði reynt að nauðga honum, að hann vildi hafa kyn­mök við Lilju Alfreðs­dóttur mennta­mála­ráð­herra og að hún væri „skrokkur sem typpið á mér dugði í“. Sagði hann að það hefði „engin gugga teymt [sig] meira á asna­eyr­unum en hún sem [hann hefði] ekki fengið að ríða“. Hann baðst afsök­unar á hegðun sinni og tók sér leyfi frá þing­störfum um skeið.

Athygli vakti svo þann 9. apríl síð­ast­lið­inn þegar Bergþór kvaddi sér hljóðs á vett­vangi Evr­ópu­ráðs­þings­ins og kvart­aði þar undan ósann­gjarnri umræðu á Íslandi um ummæli sín. Þá var­aði hann við því að tekið væri of harka­lega á kyn­ferð­is­legri áreitni þing­manna í Evrópu.

Að því er fram kemur á vef Frétta­blaðs­ins hlaut Bergþór aðeins tvö atkvæði sem for­maður þing­nefnd­ar­innar, frá sjálfum sér og Karli Gauta Hjalta­syni sem einnig lét að sér kveða á Klaustri bar í fyrra. Aðrir nefnd­ar­menn sátu hjá, en með því heldur sam­komu­lag sem gert var í upp­hafi kjör­tíma­bils­ins um skipt­ingu for­manns­sæta þing­nefnda milli flokka.