Gunnar Bragi Sveinsson og Bergþór Ólason, þingmenn Miðflokksins, saka Albertínu Friðbjörgu Elíasdóttur, þingkonu Samfylkingarinnar, um kynferðislega áreitni.

Á Klaustursupptökunum mátti heyra þingmennina gantast með að Albertína hefði reynt að „nauðga“ þeim, annars vegar á herrakvöldi íþróttafélagsins Vestra og hins vegar í samkomuhúsinu í Hnífsdal. „Það voru ýmsir sem sögðu ‘take one for the team’ en Beggi var ekki til“ sagði Sigmundur Davíð og uppskar mikinn hlátur.

Stundin fjallaði ítarlega um málið í fyrra og leitaði skýringa á ummælunum. Gunnar Bragi og Bergþór fengust ekki til að tjá sig. Albertína ræddi hins vegar við Stundina og sagði Gunnar Braga hafa hringt í sig, beðist afsökunar og sagt að ekkert af því sem fram hefði komið í samtalinu væri satt.

„Hann gaf mér leyfi til að segja ykkur að hann væri tilbúinn til að bera þetta til baka og bað mig afsökunar,“ sagði hún. „Það er hrikalegt að vera ásakaður um eitthvað sem gerðist ekki.“

„Hann gaf mér leyfi til að segja ykkur
að hann væri tilbúinn til að bera
þetta til baka og bað mig afsökunar“

Aðspurð um viðburðina sem mennirnir töluðu um kom Abertína af fjöllum. „Ég er eiginlega bara kjaftstopp. Mér er rosalega illt í hjartanu yfir öllum þessum samtölum sem þeir áttu þarna. Ég er hreinlega orðlaus. Þetta er bara ekki rétt.“ 

Nú hafa Gunnar Bragi og Bergþór tjáð sig aftur um meinta háttsemi Albertínu í andmælabréfum sem þeir sendu siðanefnd Alþingis vegna umfjöllunar nefndarinnar um Klaustursmálið. Morgunblaðið birti öll skjöl málsins í dag.

Í bréfi sínu gengur Bergþór svo langt að tala um þá Gunnar Braga sem „þolendur kynferðisbrots“. Hann segist hafa orðið fyrir erfiðri reynslu og fullyrðir að þingkonan hafi „gengið nærri sér kynferðislega“. 

Á sínum tíma skiptust þeir Gunnar Bragi á sögum af Albertínu og hlógu dátt.Í bréfi sínu til siðanefndar segist Bergþór hafa verið að opna sig í öruggu umhverfi. 

„Það vekur undrun og óhug ef það að ég leyfi mér að fá dálitla útrás fyrir það sem ég hef gengið í gegnum og tjái mig um málið með þeim hætti sem ég treysti mér til, að því er ég taldi í öruggu umhverfi, sé það notað gegn mér í pólitískum réttarhöldum,“ segir Bergþór og lýsir því sem „hryllingi“ að frásögnin hafi borist til allra landsmanna. „Að svo skuli nefnd Alþingis ætla sér að nýta þann glæp til að refsa þolendum brotsins og um leið þolendum kynferðisbrots hryggir mig óseigjanlega.“ 

Gunnar Bragi segir að Albertína hafi áreitt þá. „Í ólöglegu upptökunum eru tveir einstaklingar að segja frá miður góðum kynnum sínum af þingkonunni og hvernig hún áreitti þá,“ skrifar Gunnar Bragi. 

„Allt það sem þar er sagt stend ég við en vil þó taka fram, líkt og ég gerði við viðkomandi, að notkun á orðinu „nauðgun“ var of gróft og var hún beðin afsökunar á þeirri orðanotkun.“ 

Segir Gunnar Bragi að þetta sé ekki í eina skiptið sem hann hafi lent í slíku áreiti af hálfu þingkonunnar. „Það er hreint með ólíkindum að nefndin telji að frásögn af því sem verður ekki skýrt með orðum [öðruvísi, innsk. blaðam.] en sem lýsingu á áreiti sé brot á siðareglum.“

Ekki náðist í Albertínu við vinnslu fréttarinnar.