„Lögreglan á höfuðborgarsvæðinu er ekki með rannsóknarskyldu gagnvart Alþingismönnum.“ Þannig hljóðar svar sem Einar Steingrímsson stærðfræðingur fékk frá lögreglu þegar hann sendi lögreglustjóra ábendingu um að hugsanlega kynni Ásmundur Friðriksson þingmaður að hafa gerst sekur um hegningarlagabrot með því að þiggja endurgreiðslu á aksturskostnaði langt umfram fyrirmæli reglna um þingfararkostnað.

Einar sendi tölvupóstinn þann 22. maí síðastliðinn þegar umræða um álit siðanefndar Alþingis í máli Þórhildar Sunnu Ævarsdóttur þingkonu stóð sem hæst. Taldi nefndin að Þórhildur hefði gerst brotleg við siðareglur þegar hún sagði í Silfrinu þann 25. febrúar 2018 að uppi væri rökstuddur grunur um að Ásmundur Friðriksson hefði dregið sér fé. Hefur nú forsætisnefnd gert þá niðurstöðu að sinni.

Í fyrstu hunsaði lögregla efnisinntakið í erindi Einars og sagði Alþingismenn undanþegna rannsóknarskyldu lögreglu. Eftir að Einar falaðist eftir frekari skýringum var málið sent „til greiningar hér á ákærusviðinu“ eins og það er orðað í tölvupósti.

Þann 12. júní síðastliðinn barst Einari bréf frá aðstoðarsaksóknara hjá lögreglunni. Þar er vísað til þess að forseti Alþingis hafi æðsta vald í stjórnsýslu þingsins. Skrifstofa Alþingis hafi greint frá því í yfirlýsingu að engin gögn liggi fyrir sem bendi til þess að „rangt hafi verið haft við og röngum eða tilhæfulausum reikningum verið skilað inn til endurgreiðslu“. Þá hafi ekkert í akstursbók Ásmundur vakið grun um misferli. 

„Segja má að þessi afstaða skrifstofu Alþingis hafi ráðið úrslitum hvað [varðar] ákvörðun embættisins að taka ekki til rannsóknar kæru yðar eða ábendingu,“ segir í bréfi aðstoðarsaksóknarans. Þá er bent á að Alþingi og Ríkisendurskoðun hafi „öll tök á því að taka á þessu álitaefni“.

Samkvæmt 49. gr. stjórnarskrárinnar má ekki setja neinn alþingismann í gæsluvarðhald eða höfða mál gegn honum án samþykkis þingsins nema hann sé staðinn að glæp. Með glæp er átt við meiriháttar refsivert ásetningsbrot, oftast gegn almennum hegningarlögum, sem sætir skilyrðislausri opinberri ákæru.