Katrín Atladóttir, borgarfulltrúi Sjálfstæðisflokksins, varar við útbreiðslu eftirlitsmyndavéla í grein í Fréttablaðinu í dag. „Talsmenn eftirlitssamfélags segja oft að þeir hafi ekkert að fela, eftirlitið sé til þess að góma lögbrjóta,“ skrifar Katrín. „En við megum ekki byggja upp samfélag þar sem allir eru sjálfkrafa tortryggðir meðan langflestir fara að lögum og reglum. Áður var viðkvæðið að fylgjast með þeim sem gerðu eitthvað af sér. Nú virðist það vera að fylgjast með öllum, alls staðar, öllum stundum.“

Ástæða skrifa Katrínar er nýleg umræða á Twitter um eftirlitsmyndavél við Einarsnes í Skerjafirði, sem merkt er merkt umhverfis- og skipulagssviði Reykjavíkur. „Við nánari eftirgrennslan kom í ljós að myndefninu er varpað, að ósk borgarinnar, í beinni útsendingu á vefsíðu Vegagerðarinnar,“ skrifar Katrín. „Nú veit ég ekki hvort íbúar við götuna, eða aðrir vegfarendur, eru sáttir við að vera í beinni útsendingu á netinu allan sólarhringinn, en málið vakti furðu mína. Við nánari eftirgrennslan komst ég að því að umhverfis- og skipulagssvið er með átta eftirlitsmyndavélar víðsvegar í borgarlandinu. Tilgangurinn er sagður vera sá að fylgjast með færð vega!“

Katrín bætir því við að lögreglan sé einnig með tugi myndavéla í borginni og vilji tvöfalda fjöldann. „Áður fyrr var þessu eftirliti yfirleitt stýrt af fólki. Nú er því stýrt af tölvum sem hafa mikla vinnslugetu og geta unnið úr öllum upplýsingum jafnóðum. Andlitsgreining getur greint einstaklinga á mynd á augabragði, greint kyn, hvort viðkomandi er með tösku og margt fleira. Eftir því sem eftirlitsmyndavélum er fjölgað er auðveldara fyrir stjórnvöld (eða Vegagerðina í tilfelli Einarsness) að fylgjast með ferðum fólks, án nokkurs lögmæts tilefnis.“

„Þegar tækninni fleygir fram þarf að doka við og stíga varlega til jarðar“

Bendir Katrín loks á að stjórnvöld í Kína hafi víða sett upp eftirlitsmyndavélar í landinu og noti þær til að fylgjast með fólki hvert sem það fer. „Sama á við um nokkrar borgir í Bandaríkjunum og þar í landi er rætt um slíkt eftirlit í skólum. Félagi minn fór nýlega um LAX flugvöllinn í Los Angeles án þess að þurfa að sýna vegabréf, vélarnar þekktu hann. Þegar tækninni fleygir fram þarf að doka við og stíga varlega til jarðar. Þarf að fylgjast með færð á Einarsnesi á sumrin eða yfirleitt?“