Utanríkismálanefnd bað Jón Baldvin um umsögn vegna þriðja orkupakkans

Jón Baldvin Hanni­bals­son, fyrr­ver­andi utan­rík­is­ráð­herra, var beð­inn um að veita utan­rík­is­mála­nefnd Alþingis umsögn um inn­leið­ingu þriðja orku­pakk­ans.

Nefndin sendi 127 aðilum umsagn­ar­beiðnir þann 11. apríl síð­ast­lið­inn vegna umfjöll­unar um þings­á­lykt­un­ar­til­lögu Guðlaugs Þórs Þórð­ar­sonar utan­rík­is­mála­ráð­herra þess efnis að ákvörðun sam­eig­in­legu EES-nefnd­ar­innar, nr. 93/2017, um breyt­ingu á IV. við­auka við EES-samn­ing­inn verði stað­fest.

Var einkum leitað til sam­taka, stofn­ana og sveit­ar­fé­laga, en auk þess voru tveir ein­stak­lingar beðnir um að veita umsögn. Þetta eru þau Jón Baldvin, sem lék lyk­il­hlut­verk við und­ir­ritun og lög­fest­ingu EES-samn­ings­ins á Íslandi, og Maria Elvira Mendez Pinedo, laga­pró­fessor og sér­fræð­ingur í Evr­ópu­rétti við Háskóla Íslands. 

Jón Baldvin hefur ítrekað verið sak­aður um kyn­ferð­is­lega áreitni en fjórar konur stigu fram í Stund­inni í jan­úar síð­ast­liðnum og lýstu fram­göngu hans.

Nýjasta atvikið mun hafa átt sér stað á heim­ili Jóns Baldvins og Bryn­dísar Schram, eig­in­konu hans, á Spáni síð­asta sumar en það elsta varðar meinta áreitni hans gagn­vart tveimur 13 og 14 ára nem­endum sínum þegar hann var kenn­ari í Haga­skóla.

Þá steig mág­kona hans fram í við­tali við Stundina og sagði frá meintri áreitni hans, auk þess sem nem­endur við Mennta­skól­ann á Ísafirði lýstu atvikum frá því hann var skóla­meist­ari þar.

Jón Baldvin hefur sagt frá­sagn­irnar upp­spuna sem runn­inn sé undan rifjum dóttur hans. Að því er fram kom í við­tali við Jón Baldvin í Silfri Egils í febr­úar vinnur hann nú að bók um ásak­an­irnar á hendur sér sem ber tit­il­inn Vörn fyrir æru: Hvernig fámennur hópur öfga­femínista hefur sagt rétt­ar­rík­inu stríð á hendur. Hefur hann skrifað fjölda greina þar sem hann varar við því að mann­orð fólks sé eyði­lagt, án dóms og laga, í nafni kynja­jafn­réttis.  

Jón Baldvin, sem nú er einn af tals­mönnum sam­tak­anna Orkan okkar, sendi Alþingi umsögn um inn­leið­ingu þriðja orku­pakk­ans þann 17. apríl síð­ast­lið­inn. Í umsögn­inni seg­ist Jón Baldvin and­vígur einka­væð­ingu orku­fyr­ir­tækja og því að fjár­festar, inn­lendir jafnt sem erlendir, geti keypt virkj­ana­rétt og for­ræði yfir nýt­ingu auð­lind­ar­innar.

„Þetta er og hefur verið grund­vall­araf­staða okkar jafn­að­ar­manna varð­andi eign­ar­hald á og nýt­ingu þjóð­ar­auð­linda. Þessi afstaða er studd reynslu ann­arra þjóða, þar sem van­hugs­aðar til­raunir með einka­væð­ingu grunn­þjón­ustu af þessu tagi hafa skaðað almanna­hags­muni. Þess vegna vara ég ein­dregið við að inn­leiða lög­gjöf, sem til skamms tíma virð­ist vera mein­laus, en getur haft ófyr­ir­séðar og skað­legar afleið­ingar síðar,“ skrifar hann. 

Óttast fyrr­ver­andi utan­rík­is­ráð­herra að þeir fyr­ir­varar sem rík­is­stjórnin hefur kynnt vegna orku­pakk­ans reyn­ist hald­litlir. Þá telur hann ljóst að sam­eig­in­leg yfir­lýs­ing núver­andi orku­mála­stjóra ESB og Guðlaugs Þórs Þórð­ar­sonar utan­rík­is­ráð­herra muni reyn­ast mark­laus. Hann bendir á að EES-samn­ing­ur­inn veiti aðild­ar­ríkjum rétt til að hafna inn­leið­ingu lög­gjafar á til­teknu mál­efna­sviði ef hún er ekki talin eiga við. „Fyrir þessu eru mörg for­dæmi. Höfnun inn­leið­ingar hefur ekki í för með sér nein við­ur­lög. Afleið­ingin er sú, að mál­inu er vísað til sam­eig­in­legu EES-nefnd­ar­innar, þar sem samið er um málið. Þar með fást þeir einu fyr­ir­varar, sem öruggt hald er í.“

Loks segir hann að ef Evr­ópu­sam­bandið hætti að virða vilja kjós­enda í aðild­ar­ríkjum EES-samn­ings­ins sé hætt við að stuðn­ingur við EES- samn­ing­inn fari þverr­andi. „Þar með getur EES-samn­ing­ur­inn, með öllum þeim ávinn­ingi sem hann hefur tryggt Íslandi á und­an­förnum ald­ar­fjórð­ungi, verið í upp­námi. Á því bera þá þeir einir ábyrgð, sem vilja þröngva þriðja orku­pakk­anum upp á þjóð­ina – með ófyr­ir­séðum afleið­ingum og í trássi við þjóð­ar­vilj­ann.“