Nýr eigandi HS Orku til rannsóknar í risavöxnu skattsvikamáli

Fjár­fest­ing­arisi sem er til rann­sóknar í risa­vöxnu skattsvika­máli hefur eign­ast meiri­hluta í HS Orku, þriðja stærsta orku­fyr­ir­tæki Íslands sem á meðal ann­ars 30 pró­senta hlut í Bláa lón­inu.

Fjöldi starfs­manna fjár­fest­ing­arris­ans hefur verið yfir­heyrður vegna rann­sóknar á 7.500 millj­arða króna skattsvika­máli sem teygir sig um alla Evrópu og víðar.

Innergex Renewable Energy Inc. til­kynnti í gær að félagið hefði selt ástr­alska fjár­fest­inga­bank­anum Macquarie alla hluti sína í Magma Energy Sweden A.B. sem átti 53,9% hlut í HS Orku. Kaup­verðið er 304,8 millj­ónir banda­ríkja­dala, eða sem nemur um 37 millj­örðum íslenskra króna.

Macquarie Group Limited er alþjóð­legur fjár­fest­inga­banki með höf­uð­stöðvar í Ástralíu. 14 þús­und manns í 25 löndum starfa hjá fyr­ir­tæk­inu.

Kaupandi HS Orku er dótt­ur­fé­lagið, Macquarie Infrastructure and Real Assets (MIRA), sem er hluti af Macquarie Asset Mana­gement, stærsta inn­viða­fjár­fest­inga­sjóði í heimi. Sjóð­ur­inn stýrir eignum upp á and­virði um 47 þús­und millj­arða íslenskra króna.

Einn stærsti leikandinn í svikunum

Ljóstrað var upp um vef skattsvika í CumEx skjöl­unum svoköll­uðu, sem opin­beruð voru 18. októ­ber 2018. Rannsókn 19 evr­ópskra fjöl­miðla, sem þýska frétta­stofan Correctiv fór fyrir, leiddi í ljós falskar arð­greiðslur banka­manna, lög­manna og milli­liða sem þáðu end­ur­greiðslur á skatti sem aldrei hafði verið greiddur. Brotin varða sam­ráð aðila sem sviku um 55 millj­arða evra, eða 7.500 millj­arða króna, úr rík­is­sjóðum Evr­ópu­ríkja á 15 ára tíma­bili.

Macquarie var einn helsti leik­and­inn í mál­inu, mest­megnis í Danmörku og Þýska­landi, og hélt áfram löngu eftir að lög­fræð­ingar inn­an­húss höfðu lýst yfir efa­semdum um fram­kvæmd­ina. Rík­is­sjóður Þýska­lands er tal­inn hafa orðið verst úti og sætir málið rann­sókn þar í landi.

Nicholas MooreFrá­far­andi for­stjóri Macquarie var kall­aður til yfir­heyrslu vegna skattsvikanna.

Guardian greindi frá því síð­asta haust að þýsk lög­reglu­yf­ir­völd hyggð­ust yfir­heyra bæði nýjan for­stjóra Macquarie, Shemara Wikramanayake, og frá­far­andi for­stjóra þess, Nicholas Moore. Allt að 30 starfs­menn alls verða yfir­heyrðir og gætu sumir þeirra, þar á meðal for­stjór­arnir tveir, fengið rétt­ar­stöðu grun­aðra.

Þrír af stærstu líf­eyr­is­sjóðum Dan­merkur hafa sagst munu end­ur­skoða við­skipti sín við Macquarie vegna máls­ins. Talið er að rík­is­sjóður Dan­merkur hafi orðið af 232 millj­örðum króna vegna svikanna.