Stjórn Læknafélags Íslands dró til baka umsögn um þungunarrofsfrumvarp Svandísar Svavarsdóttur heilbrigðisráðherra í síðustu viku. Í umsögninni hafði stjórnin lýst sig mótfallna því að þungunarrof yrði heimilað til loka 22. viku meðgöngu eins og gert er ráð fyrir í frumvarpinu. Ekki var einhugur um umsögnina hjá félaginu og var því óskað eftir því að hún yrði fjarlægð af vef Alþingis.

Reynir Arngrímssonformaður Læknafélags Íslands.

„Ég sendi þessa umsögn samkvæmt því hefðbundna verklagi sem tíðkast hefur um samráð við stjórn félagsins,“ segir Reynir Arngrímsson, formaður Læknafélagsins í svari við fyrirspurn Stundarinnar um málið. „Þegar í ljós kom síðar að skoðanir lækna eru bæði mjög sterkar og ólíkar um þetta mál bar ég þá tillögu upp við stjórn Læknafélags Íslands, fyrr í þessari viku, að við myndum draga þessa umsögn til baka. Hún var samþykkt einróma og því óskuðum við eftir því við Alþingi að umsögnin yrði fjarlægð af vef þingsins.“

Reynir segir að stjórnin muni ræða framhaldið undir sérstökum dagskrárlið á stjórnarfundi næsta mánudag. „Þar mun ég leggja fram tillögu um málþing um þungunarrofsfrumvarpið með framsögum úr ýmsum áttum innan Læknafélags Íslands. Kannski myndast þar grunnur fyrir sameiginlega umsögn um frumvarpið en það er samt ekkert ólíklegt að skoðanir verði það skiptar innan LÍ eins og í samfélaginu öllu að félaginu verði erfitt eða jafnvel ómögulegt að senda frá sér eitt álit á þessu stóra máli.“