Íslands­hótel hafa hagn­ast um hátt í 4 millj­arða í ferða­manna­góð­ær­inu frá 2010. Þetta hefur gert eig­endum hót­el­keðj­unnar kleift að greiða sér sam­tals 832 millj­ónir í arð, þar af 400 millj­ónir á und­an­förnum þremur árum.

Nýlega kom Davíð Torfi Ólafsson, fram­kvæmda­stjóri Íslands­hót­ela, fram í við­tali við Morg­un­út­varpið á Rás 1 og gagn­rýndi kröfu­gerð verka­lýðs­hreyf­ing­ar­innar. „Langar mig til að borga fólk­inu þau laun sem kröfu­gerð verka­lýðs­fé­lag­anna hljóðar upp á? Já, ég væri rosa­lega til í það. Svig­rúmið er bara ekki svona,“ sagði hann. „Við vitum það að þetta mun hafa áhrif á verð­bólgu.“ 

„Svig­rúmið er bara ekki svona“

Eflingu – stétt­ar­fé­lagi var til­kynnt um það í febr­ú­ar­lok að eins konar skammar­listi yfir þá starfs­menn sem taka sér flesta veik­inda­daga hengi uppi á töflu í almennu rými starfs­manna á Grand hót­eli, eins þeirra 18 hót­ela sem til­heyra Íslands­keðj­unni. Þetta var, að því er fram kom í til­kynn­ingu frá Eflingu, „aðeins eitt af mörgum atriðum sem hafa gert vinnu­stað­inn veru­lega óþægi­legan fyrir lægst laun­aða starfs­fólkið þar, sem flest er erlendis frá“. Mannauðs­stjóri Íslands­hót­ela hefur vísað þessum ásök­unum á bug. 

Aðaleigandinn fékk hundruð milljóna í arð

Samkvæmt nýjasta árs­reikn­ingi Íslands­hót­ela var hreinn launa­kostn­aður fyr­ir­tæk­is­ins 4 millj­arðar árið 2017 og starfs­manna­fjöldi 775  miðað við heils­árs­störf. Í við­tal­inu við Davíð kom fram að fólk í lægst­laun­uðu hót­el­stör­f­unum væri að með­al­tali með um 330 til 340 þús­und krónur á mán­uði en ynni tvær helgar með vakta­á­lagi. „Nei nei, þetta eru ekki há laun, það er alveg rétt. Þetta er bara raun­veru­leiki sem blasir við okkur. Gjarnan myndi ég vilja hækka þetta miklu meira en þau spil sem eru á borð­inu, en við þurfum alltaf að horfa á heild­ar­á­hrifin,“ sagði hann.

Faðir Davíðs er aðal­eig­andi hót­el­keðj­unnar, Ólafur D. Torfason, en hann á 70 pró­senta hlut í Íslands­hót­elum. Af þeim 150 millj­óna arð­greiðslum sem runnu út úr fyr­ir­tæk­inu í fyrra komu meira en 100 millj­ónir í hlut eign­ar­halds­fé­lags Ólafs, ÓDT ráð­gjafar ehf. Eigið fé þess nam 12,5 millj­örðum í árs­lok 2017 en þar af var 69,37 pró­senta hlutur þess í Íslands­hót­elum hf. met­inn á 11,3 millj­arða. ÓDT ráð­gjöf hagn­að­ist um 323,5 millj­ónir árið 2017 og 675 millj­ónir árið 2016.