Félagsbústaðir seldu starfsmanni sínum fimm bíla og dóttur annars starfsmanns einn bíl enn fyrir samtals 780 þúsund krónur í september 2018. Framkvæmdastjóri segir að auglýsingar til að selja bílana hafi ekki borið árangur, en framvegis verði bílar seldir á almennum markaði.

Áheyrnarfulltrúar Miðflokksins og Flokks fólksins í borgarráði lögðu inn fyrirspurn vegna sölu bílanna til starfsmannsins. „Um var að ræða 6 smábíla, sem voru 11 til 13 ára gamlir og eknir frá 108 þúsund til tæplega 160 þúsund kílómetra og flestir í döpru ástandi,“ segir í svari Sigrúnar Árnadóttur, framkvæmdastjóra Félagsbústaða. „Að mati bílasala sem Félagsbústaðir leituðu til hefðu þessir bílar verið þungir í sölu vegna aldurs og ástands og taldi hann að fá mætti í hæsta lagi um 150 þús. kr. staðgreitt fyrir hvern Hondu bíl en eitthvað meira fyrir Toyotuna. Sölulaun fyrir hvern bíl hefðu verið 63.500 krónur.“

Segir í svarinu að auglýsingar í Fréttablaðinu og á vef Félagsbústaða hafi ekki borið árangur. Starfsmönnum hafi því verið boðið að gera tilboð í fimm Honda Jazz bíla og einn Toyota Yaris. Keypti einn starfsmaður fimm bíla og dóttir annars einn. „Samanlagt fengust því 780 þúsund krónur fyrir bílana með þessu móti sem er svipað eða heldur meira en vænta mátti samkvæmt upplýsingum sem fyrir lágu og að teknu tilliti til sölulauna. Það er hins vegar með öllu óvíst hvort eða hvernig hefði tekist að selja bílana.“