Bíla­leigan Procar ehf. seldi bíla fyrir meira en tvo millj­arða árin 2014, 2015 og 2016. Á þessum árum stóð fyr­ir­tækið í stór­tæku svindli þar sem átt var við kíló­metra­stöðu not­aðra bíla til að gera þá sölu­væn­legri.

Kveikur fjall­aði um málið í gær en fyr­ir­tækið hefur sent út yfir­lýs­ingu þar sem hátt­semin er að hluta við­ur­kennd. 

200 millj­óna hagn­aður var af rekstri bíla­leig­unnar árin 2015 og 2016 ef litið er fram hjá fjár­magnsliðum, en alls voru rekstr­ar­tekj­urnar 2,2 millj­arðar árið 2016 og 1,3 millj­arðar árið 2015. Þetta kemur fram í árs­reikn­ingum félags­ins. Procar er í eigu Gunnars Björns Gunn­ars­sonar og Platinum ehf., eign­ar­halds­fé­lags Haraldar Sveins Gunn­ars­sonar.

Þegar vaxta­gjöld eru tekin með í reikn­ing­inn hagn­að­ist fyr­ir­tækið um 21 milljón árin 2015 og 2016. Hagn­að­ur­inn var meiri árin á undan, 51 milljón árið 2014 og 11,3 millj­ónir 2013. Þetta gerði eig­endum kleift að greiða sér út arð upp á 48 millj­ónir króna, en ákvörð­unin var tekin á aðal­fundi félags­ins þann 27. júlí 2015. 

Samkvæmt yfir­lýs­ingu sem Procar sendi út í gær var átt við kíló­metra­mæl­ana frá 2013 til 2015. Eins og Stundin greindi frá í dag stóð svind­lið þó yfir langt fram eftir árinu 2016 og benda fyr­ir­liggj­andi gögn til þess að Gunnar Björn, eig­andi og fram­kvæmda­stjóri, hafi sjálfur tekið þátt í því. Eignir fyr­ir­tæk­is­ins voru metnar á um millj­arð í árs­lok 2016 en eigið fé þess nam 23 millj­ónum.