Bílastæðum verður fækkað verulega við Tryggvagötu þannig að listaverk Gerðar Helgadóttur á Tollhúsinu verði betur sýnilegt. Endurhönnun götunnar var samþykkt í skipulags- og samgönguráði Reykjavíkur á miðvikudag.
Gert er ráð fyrir 150 milljónum króna vegna framkvæmda við Tryggvagötu. Gatan verður einstefna til vesturs, lengra en nú er fyrir, þannig að einstefnu ljúki við gatnamótin við Grófina. Síðasta sumar var gatan endurnýjuð milli Lækjargötu og Pósthússtrætis og er gert ráð fyrir sambærilegri útfærslu og þar. Gatnamót verða upphækkuð með stein- og hellulögn og gert er ráð fyrir gróðri.
„Tillagan gerir ráð fyrir að því að skapa rými fyrir fólk,“ segir í gögnum borgarinnar. „Það er gert með því að að fækka bílastæðum verulega. Í dag eru um 38 stæði í Tryggvagötu á þessum kafla, þar af 24 skástæði við Tollhúsið. Lögð verður áhersla á að tryggja stæði fyrir fatlaða á fleiri en einum stað. Einnig skapast rými til að taka betur tillit til vörudreifingar en er í dag.“
Við afgreiðslu málsins í skipulags- og samgönguráði lagðist Baldur Borgþórsson, fulltrúi Miðflokksins, gegn samþykkt þess. „Um er að ræða þjónustu sem er mikið sótt af borgurum jafnt sem fyrirtækjum og mun útrýming bílastæða við húsið valda miklu ónæði fyrir viðskiptavini Tollstjóraembættisins,“ segir í bókun hans.
Meirihlutinn bendir á að bílastæðum í miðborginni fjölgi, en fækki ekki, með tilkomu nýs bílastæðahúss. „Norðan Tryggvagötu, við mósaíkverk Gerðar Helgadóttur, er sólríkt svæði sem mun nýtast til útiveru fyrir fólk í stað bíla,“ segir í bókun meirihlutans. „Því skal einnig haldið til haga að við hlið Tollhússins, undir Hafnartorgi, opnar innan skamms bílakjallari með 1.100 bílastæðum auk þess sem áfram verða bílastæði í götukanti sunnan Tryggvagötu.“
Athugasemdir