Konurnar sem halda úti Facebook hópnum #metoo Jón Baldvin Hanni­bals­son hafa birt 23 nafn­lausar sögur frá jafn­mörgum konum á sér­stakri blogg­síðu. Gerast sög­urnar á nær 60 ára tíma­bili og lýsa kyn­ferð­is­legri áreitni Jóns Baldvins.

„Við viljum gera þær opin­berar í anda þeirrar bylgju sem farið hefur yfir heim­inn og sam­einar konur þegar þær segja:  Ég líka – Me too!“ skrifa kon­urnar á síð­unni. „Við viljum að það sam­fé­lag sem hefur litið undan þrátt fyrir að kyn­ferð­is­brot hans hafi verið gerð opin­ber geti nú lesið þær reynslu­sögur sem er okkar sann­leikur. Þannig viljum við frelsa okkur frá þeirri þján­ingu sem sam­skipti við hann hafa valdið okkur í ára­tugi. Við erum frels­inu fegnar.“

Ástæðu þess að sög­urnar eru birtar nafn­lausar segja kon­urnar vera að beina sjónum að ger­and­anum Jóni Bald­vinni. „Nöfn okkar skipta ekki máli heldur hann sem ger­andi. Umræðan á að snú­ast um hann, brot hans og afleið­ingar þeirra. Það er kom­inn tími til að Jón Baldvin taki afleið­ingum gerða sinna,“ skrifa þær.

Segir fjölmiðla hafa viljað stöðva bók og málþing

Í grein í Frétta­blað­inu í dag skrifar Jón Baldvin að sög­urnar séu runnar undan rifjum Aldísar dóttur sinnar. Markmið fjöl­miðla með umfjöllun um þær hafi verið að koma í veg fyrir útgáfu bókar í til­efni af átt­ræð­is­af­mæli hans og mál­þing „um erind­is­bréf jafn­að­ar­manna á nýrri öld“.

Jón Baldvin skrifar að hópur öfga­fem­inista hafi sagt rétt­ar­rík­inu stríð á hendur. Hann hafi verið fund­inn sekur í fjöl­miðlum og for­dæmdur án rétt­ar­halds. Þær hafi tekið sér rit­stjórn­ar­vald og viljað banna bækur eins og bók sína „Tæpitungu­laust“, sem til stóð að kæmi út í febr­úar.

„Athygli mín hefur verið vakin á því, að eng­inn í þing­flokki Sam­fylk­ingar, sem telur sig a.m.k. á tylli­dögum vera arf­taka jafn­að­ar­stefnu í íslenskum stjórn­málum, þorði að birta nöfn sín á heilla­óska­skrá til „hins aldna leið­toga íslenskra jafn­að­ar­manna“,“ skrifar Jón Baldvin. „Vildu þau kannski ekki? Eða þorðu þau ein­fald­lega ekki fyrir sitt litla líf að rísa gegn tyft­un­ar­valdi öfga­fem­inista, sem hafa hreiðrað um sig í valda­stöðum í flokknum?“