Gunnar Bragi Sveinsson, þingmaður Miðflokksins, snýr aftur á Alþingi í dag eftir launalaust frí í kjölfar þess að Klaustursupptökurnar voru gerðar opinberar. Þetta tilkynnti Steingrímur J. Sigfússon, forseti Alþingis, við upphaf þingfundar rétt í þessu.

„Fyrstu dagar þingfunda á nýju ári, og framganga forseta Alþingis að undanförnu, er með þeim hætti að annað er óhjákvæmilegt en að nýta sér allan rétt til þess að vera inni á þeim leikvelli þar sem að mér er sótt og svara fyrir mig á þeim vettvangi en ekki utan hans,“ segir Gunnar Bragi í yfirlýsingu sem Fréttablaðið birti í dag. „Þess vegna mæti ég á nýjan leik til starfa minna á Alþingi í dag.“

Bergþór Ólason, sem var með Gunnari Braga á Klaustri bar, segist snúa aftur á þing fyrr en hann ætlaði þar sem spjót standi á honum á Alþingi. Telur hann sig þurfa að verjast pólitískum hjaðningavígum og vonast til að aðrir þingmenn muni leggja sitt af mörkum með sér til að gera þingstörf málefnaleg en ekki persónuleg.

Þetta kemur fram í tilkynningu sem Bergþór sendi fjölmiðlum rétt í þessu. Í grein í Morgunblaðinu í dag sagði hann Klaustursupptökurnar ólögmætar og umfjöllun fjölmiðla um þær hafa orðið til að særa fólk, sem annars hefðu ekki komið til eyrna þeirra sem talað var um. Á upptökunum má heyra Bergþór og Gunnar Braga segja grófa hluti um kvenkyns stjórnmálamenn.

Tilkynning Gunnars Braga í heild:

Í kjölfar óviðeigandi og særandi orða og ólögmætrar upptöku á þeim þá tók ég þá ákvörðun að taka mér launalaust leyfi frá þingstörfum eftir að hlerunarmálið umtalaða komst í hámæli. Ég vildi skoða hug minn, safna kröftum og ræða síðan við bakland mitt. Ég iðrast og hef beðist fyrirgefningar á orðum mínum og geri það enn á ný.

Ég hef leitað ráðgjafar og um leið notið mikils skilnings og stuðnings ættingja, vina og félaga innan flokks og utan. Þakka ég þeim hvatninguna og traustið.

Miðflokkurinn gaf mér það svigrúm sem ég óskaði eftir og hvorki hvatti mig né latti til að flýta endurkomu minni. Vel má skilja það hlutleysi sem vísbendingu um að hvorki ég né aðrir væru ómissandi fyrir flokkinn og undir það tek ég heilshugar. Ég var á hinn bóginn kosinn til starfa á Alþingi af fjölda fólks og gagnvart því ber ég ríkar skyldur. Þær vildi ég að sjálfsögðu rækja á nýjan leik í fyllingu tímans. Þakka ég þeim fjölmörgu stuðningsmönnum sem hafa sett sig í samband við mig og minnt mig á þessar skyldur mínar og hvatt mig til starfa.

Stundunum eru ákvarðanir nánast teknar fyrir mann. Fremur óvænt – en samt ekki - blasir svarið við því hvenær rétt sé að snúa til baka. Fyrstu dagar þingfunda á nýju ári, og framganga forseta Alþingis að undanförnu, er með þeim hætti að annað er óhjákvæmilegt en að nýta sér allan rétt til þess að vera inni á þeim leikvelli þar sem að mér er sótt og svara fyrir mig á þeim vettvangi en ekki utan hans. Þess vegna mæti ég á nýjan leik til starfa minna á Alþingi í dag.

Tilkynning Bergþórs í heild:

Í kjölfar óvarlegra orða minna, ólögmætrar upptöku á þeim, fjölmiðlaumfjöllunar og vandlætingar í samfélaginu tók ég þá ákvörðun að taka mér leyfi frá þingstörfum , íhuga stöðu mína og hvernig ég gæti safnað vopnum mínum, endurheimt traust kjósenda og haldið áfram þeim störfum sem ég var kjörinn til.

Endurmat af þessu tagi þarf sinn tíma og hann ætlaði ég að taka mér. Í ljósi þeirra spjóta sem á mér stóðu strax á fyrstu dögum Alþingis, eftir að það kom saman á nýju ári, tel ég hins vegar óhjákvæmilegt að flýta för minni og taka mér stöðu þar sem ég get í senn varist ágjöfinni og haldið áfram að sinna þeim verkefnum sem mér hefur verið trúað fyrir.

Mikilvægt er að störf Alþingis komist í eðlilegan farveg sem allra fyrst í stað pólitískra hjaðningavíga enda þótt sumum þyki sóknarfæri á þeim vettvangi. Ég mun leggja mitt af mörkum til þess að þingstörfin verði málefnaleg en ekki persónuleg á vikunum og mánuðunum sem framundan eru. Vonandi er að aðrir muni leggja sig fram um slíkt hið sama.