Postura, með­höndl­ara­stofa Jóhann­esar Tryggva Svein­björns­sonar, sendir þeim við­skipta­vinum hlýjar kveðjur sem haldið hafa tryggð við fyr­ir­tækið þrátt fyrir að tugir kvenna hafi sakað Jóhannes um kyn­ferð­is­brot. „Við hjá Postura erum virki­lega þakk­lát stuðn­ingi frá öllum þeim við­skipta­vinum sem halda traust og trú við okkur, stundum þegar blæs á móti og þá er tvennt í stöð­unni að fara í skjól eða berj­ast á móti vindi. Hlökkum til hvers dags með ykkur, kv postura Crew,“ segir í færslu sem fyr­ir­tækið birti á Facebook nú í byrjun vik­unnar. 

DV og Frétta­blaðið greindu frá því fyrir jól að tæp­lega 30 konur hefðu leitað sér lög­fræði­að­stoðar vegna meintra brota Jóhann­esar Tryggva gegn þeim. „Ég sér­hæfi mig í losa um við­nám og spennu, leið­rétta lík­ams­stöðu og lag­færa verki í stoð­kerf­inu,“ er haft eftir Jóhann­esi á vef fyr­ir­tæk­is­ins. Hann hefur gefið lítið fyrir ásak­an­irnar, gert lög­manni kvenn­anna upp ann­ar­legar hvatir og hvatt karl­menn til að manna sig upp gagn­vart „crazy bitches þarna úti“. 

Elísabet Ýr Atla­dóttir, femínisti sem hefur látið tals­vert að sér kveða í umræð­unni um mál­efni kynj­anna und­an­farin ár, vekur athygli á til­kynn­ingu fyr­ir­tæk­is­ins á Facebook. „Maðurinn sem rekur þessa stofu, Jóhannes Tryggvi Svein­björns­son, hefur verið kærður af amk 15 konum fyrir kyn­ferð­is­brot,“ skrifar hún. „Það er greini­lega bara mót­vindur og leið­indi sem þarf smá sam­stöðu gegn. Hann virð­ist rosa­lega þakk­látur fyrir þau sem hunsa það algjör­lega að það er verið að kæra hann marg­falt. Hann hefur gert grín að þessu, gerir lítið úr kon­unum sem ásaka hann, þakkar svo fyrir með­virkni fólks,“ skrifar hún.