Mikill meirihluti lækna telur sig vera undir of miklu álagi og hefur helmingur þeirra íhugað að láta af störfum. Þetta kemur fram í könnun sem var gerð á meðal ríflega helmings allra lækna á Íslandi. Fréttablaðið greinir frá.

Ólafur Þór Ævarsson geðlæknir stýrði rannsókninni, sem verður kynnt í dag á Læknadögum. „Við vissum það svo sem fyrir fram að læknar væru undir álagi en þarna er spurt um þetta á markvissan hátt,“ segir Ólafur Þór. „Læknar eru undir gríðarlegu álagi og þeir finna fyrir einkennum sem eru truflandi eins og kvíða, depurð og einbeitingartruflunum. Það eru auðvitað merki um ofurálag og í sumum tilfellum kulnun.“

Ekki var mikill munur á milli lækna eftir starfsstöðvum. Töldu læknarnir að 72 prósent starfsstöðva þeirra væru undirmannaðar. „Margir læknar eru undir miklu álagi og margir hugleiða það að hætta eða reyna að skipta um starf og þá er ekki um margt annað að ræða en að fara til útlanda,“ segir Ólafur Þór. „Það eru ekki margir vinnustaðir fyrir alla þá sem eru mjög sérhæfðir og svo er heldur ekki auðvelt að færa sig um set innan kerfisins.“