Jón Baldvin Hanni­bals­son nýtti bréfs­efni sendi­ráðs Íslands í Washington þegar hann óskaði eftir því að dóttir sín yrði nauð­ung­ar­vi­stuð á geð­deild. Þetta full­yrðir Aldís Schram, umrædd dóttir Jóns Baldvins. Aldís segir jafn­framt að Jón Baldvin hafi mis­notað stöðu sína í sem sendi­herra í per­sónu­legum til­gangi, þannig hafi hann nýtt sér stöðu sína til að fá lög­reglu til að brjóta sér leið inn á heim­ili Aldísar, ásamt lækni, án þess að nokkuð bendi til þess að þörf hafi verið á slíku inn­gripi.

Aldís greindi frá þessu í við­tali í Morg­un­út­varpi Rásar 2 í morgun. Í nýjasta tölu­blaði Stund­ar­innar greindu fjórar konur frá meintri kyn­ferð­is­legri áreitni Jóns Baldvins. Elstu sög­urnar eru frá sjö­unda ára­tug síð­ustu aldar en sú nýjasta frá því síð­asta sumar. Þá hefur fjöldi kvenna gengið í #metoo hóp á Facebook þar sem frek­ari sögur af kyn­ferð­is­brotum hans og ósæmi­legri hátt­semi hafa komið fram.

Jón Baldvin lýsti því í sam­tali við Stundina að umræddar ásak­anir eigi rætur sínar að rekja til Aldísar, hún hafi spunnið upp sögur um sig og ástæðan væri sú að hún ætti við geð­ræn vanda­mál að stríða. Aldís rit­aði í fram­haldi af því færslu á Facebook þar sem hún birti vott­orð sál­fræð­ings­ins Gunnars Hrafns Birg­is­sonar því til sönn­unar að ekk­ert benti til þess að hún væri haldin, eða hefði nokkurn tíma verið haldin, geð­sjúk­dómi. Hún væri hins vegar haldin ein­kennum áfallastreitu.

Nauðungarvistun viðbragð við ásökunum

Aldís lýsti því í við­tal­inu á Rás 2 að hún hefði verið nauð­ung­ar­vi­stuð á geð­deild í sex skipti og rekur hún það í öllum til­vikum til þess að Jón Baldvin faðir hennar hafi nýtt sér stöðu sína og áhrif til að koma því svo fyrir. Umræddar nauð­ung­ar­vist­anir hafi allar verið við­bragð við því að Aldís hafi borið upp á Jón Baldvin kyn­ferð­is­brot, bæði gegn sér og í garð ann­arra.

Aldís lýsti því í Morg­un­út­varp­inu að þegar árið 1992 hafi hún rætt við föður sinn um kyn­ferð­is­brot hans, eftir að skóla­systir hennar lýsti því fyrir henni að hún hefði vaknað upp við að Jón Baldvin væri að áreita hana kyn­ferð­is­lega. Aldís segir að eftir að hún bar þetta upp á föður sinn, og hótað því að hún myndi kæra hann, hafi hún verið nauð­ung­ar­vi­stuð á geð­deild í heilan mánuð. Hún geti ekki annað skilið en að Jón Baldvin hafi borið þar ábyrgð.

Jón Baldvin var á þessum tíma utan­rík­is­ráð­herra Íslands. Eftir þetta hafi hún fimm sinnum verið nauð­ung­ar­vi­stuð á geð­deild og telur Aldís að sökum stöðu sinnar sem ráð­herra og síðar sendi­herra hafi Jóni Baldvin verið kleyft að hafa sam­band við lög­reglu og heil­brigð­is­yf­ir­völd og láta nauð­ung­ar­vista hana, nán­ast að vild. Þá hafi Jón Baldvin notað bréfs­efni sendi­ráðs Íslands í Washington þegar hann fór fram á það við dóms­mála­ráðu­neytið að Aldís yrði nauð­ung­ar­vi­stuð og einnig hafi hann í ein­hverjum til­vikum und­ir­ritað bréfin sem sendi­herra.

Segir Jón Baldvin hafa brotið gegn sér í æsku

Í þessu sam­hengi bendir Aldís á atburð árið 1998 þegar lög­regla, ásamt lækni og ónafn­greindum ætt­ingja Aldísar, brotið sér leið inn á heim­ili hennar. Ekkert bendir til þess að nauð­syn hafi borið til þess. Lögregla og læknir hafi því yfir­gefið hús­næðið skömmu síðar. Aldís kall­aði eftir og fékk lög­reglu­skýrslu um atvikið. „En viti menn, sem ég vissi ekki fyrr en ég las lög­reglu­gögn, að aðferð þessi kall­ast aðstoð við erlent sendi­ráð, sam­kvæmt lög­reglu­gögnum.“

Aldís hefur borið föður sinn þungum sökum, í Frétta­blað­inu um helg­ina og Morg­un­út­varp­inu í morgun. Þar lýsti hún því að árið 2002 hafi hún farið ásamt dóttur sinni til Washington til að reyna að sætt­ast við for­eldra sína. Hún hafi eina nótt­ina þar vaknað upp við að Jón Baldvin hafi setið á rúm­stokki hennar. „Það er þá sem rifj­ast upp fyrir mér hvað hann gerði mér þegar ég var barn.“

Svarar ásökunum með geðveiki dóttur sinnar

Faðir hennar hefur hins vegar haldið því fram að frá­sagnir kvenna af kyn­ferð­is­legri áreitni megi rekja til geð­veiki elstu dóttur sinnar.  „Aldís dóttir mín hefur spunnið þær sögur og það er þyngra en tárum taki. Ég hef svarað því áður og end­ur­tek það ekki,“ sagði Jón Baldvin við Stundina, þegar hann svar­aði fyrir frá­sagnir fjög­urra kvenna sem sök­uðu hann um kyn­ferð­is­lega áreitni. 

Jón Baldvin tók í sama streng árið 2012 þegar hann svar­aði fyrir bréfin sem hann sendi Guðrúnu Harð­ar­dóttur. „Þetta á ekk­ert erindi við almenn­ing, ekki frekar en geð­veiki dóttur minnar,“ sagði hann þá við DV. 

Í kjöl­farið steig Aldís fram í við­tali við DV í októ­ber 2013, þar sem hún sagði sögu sína. Þar sagð­ist hún hafa vaknað við það árið 1991 að Jón Baldvin stóð yfir henni. „Skömmu eftir lát ömmu minnar vakn­aði ég upp við það um nótt að faðir minn stóð yfir mér þar sem ég lá sof­andi heima hjá honum og sagði mér óbirt­ing­ar­hæf tíð­indi um sam­skipti hans við aðrar konur í fjöl­skyld­unni,“ sagði Aldís þá. „Þetta varð mér algert áfall og hafði þau áhrif að virð­ing mín gagn­vart honum og traust mitt til hans flaug algjör­lega út um glugg­ann. Jón Baldvin kallar þetta sjúka hug­ar­óra mína en mig skortir hug­ar­flug til að skálda því­líkan óþverra upp. Lát ömmu minnar var mér áfall og þessi við­bjóður sem hann lét dynja á mér var mér annað áfall.“

Þar sagði hún jafn­framt að hún hefði hringt í föður sinn og hótað að kæra hann vegna frá­sagnar ann­arrar konu af áreitni hans. Eftir það hafi Jón Baldvin farið með hana upp á geð­deild og látið nauð­ung­ar­vista.