Elísabet Ýr Atladóttir var 8. janúar síðastliðinn sýknuð af öllum kröfum Bjarna Hilmars Jónssonar, en hann hafði stefnt Elísabetu vegna meiðyrða. Krafðist Bjarni Hilmar þess að ellefu tilgreind ummæli Elísabetar yrðu dæmd dauð og ómerk. Á það féllst dómurinn ekki.
Bjarni Hilmar stefndi Elísabetu fyrir ærumeiðingar í mars á síðasta ári. Var ástæða stefnunnar bloggskrif Elísabetar á síðuna kvenfrelsi.wordpress.com í febrúar sama ár. Þar skrifaði Elísabet pistil um viðtal sem birtist við Bjarna á fréttavefnum Vísi undir fyrirsögninni „Handtekinn grunaður um að hafa myrt eiginkonu sína sem fyrirfór sér“. Í viðtalinu er rætt við Bjarna um andlát eiginkonu hans, Susan Mwihaki Maina, og um handtöku hans vegna gruns um að hann hefði ráðið Susan bana.
Fyrirsögnin á bloggpistli Elísabetar var hinn sama og í frétt Vísis, utan að hún sleppti síðustu þremur orðunum. Fyrirsögnin á pistli Elísabetar var „Handtekinn grunaður um að hafa myrt eiginkonu sína“ og er umrædd fyrirsögn ein af níu ummælum úr pistlinum sem Bjarni Hilmar krafðist þess að yrði dæmd dauð og ómerk. Ítarlega var rætt við Elísabetu í viðtali í Stundinni 7. desember síðastliðinn.
Í dómsorði kemur fram að fallast megi á það með Bjarna Hilmari að skrif Elísabetar feli í sé afar neikvæða umfjöllun og einnig megi fallast á það að pistillinn sé ósmekklegur. Hins vegar verði að játa Elísabetu rýmra frelsi en ella til að tjá sig um einkalíf Bjarna Hilmars þar eð hann hefði sjálfur gert það að opinberu umfjöllunarefni með umræddu blaðaviðtali. Hvað varðar tilgreind ummæli Elísabetar og kröfu Bjarna Hilmars þess efnis að þau yrðu dæmd ómerk var þeim kröfum hafnað í öllum tilvikum.
Athugasemdir