Sviðslistafólk kemur Báru Halldórsdóttur, uppljóstrara í Klaustursmálinu, til varnar á netinu í dag eftir að ljóst varð að þingmennirnir sem hún náði á upptöku hyggjast halda áfram málarekstri gegn henni. Segir Margrét Erla Maack skemmtikraftur að þingmennirnir hafi ekki skilning á kabarett.

Þingmenn Miðflokksins hafa kært úrskurð Héraðsdóms Reykjavíkur, þar sem hafnað var beiðni þeirra um að fram færu vitnaleiðslur og öflun sýnilegra sönnunargagna um atburðina á Klaustri, til Landsréttar.

Í kærunni er bent á að Bára hafi setið á Klaustri í fjóra tíma og sleppt æfingu sem hún hafi ætlað að fara á. „Hafi hún þó sagst hafa verið á leiðinni á æfingu á leiksýningu sem ætlunin var að frumsýna tveimur dögum síðar, án þess að þetta hafi neitt tálmað þaulsetu hennar yfir upptökunum,“ segir í kærunni. Er þetta notað til þess að rökstyðja fyrirframgefinn ásetning Báru um að „njósna“.

Í viðtali við Stundina kom fram að hún hafi ætlað á æfingu fyrir menningar- og skemmtiviðburðinn Rauða skáldahúsið í Iðnó kvöldið 20. nóvember þegar atburðirnir áttu sér stað. Bára hefur komið fram í hlutverki spákonu og dregið Tarot-spil

Margrét Erla Maack, sem sjálf hefur sýnt á þessum kvöldum og stofnaði einnig Reykjavík Kabarett, segir í færslu á Facebook að þingmennirnir hafi ekki skilning á hvernig kabarett virkar. „Þetta eru skemmtiatriði,“ skrifar Margrét. „Hver og einn kemur með sitt, og hvert og eitt atriði tengist ekki öðrum. Æfingar eru oftast tæknirennsli eða einfaldlega talað í gegnum sýninguna, „kveikið á laginu minu áður en ég geng inn“ og svoleiðis.“

Segja rök þingmannanna ekki halda vatni

Rauða skáldahúsið birti einnig færslu á Facebook í dag þar sem rök þingmanna Miðflokksins og lögmanns þeirra, Reimars Péturssonar, eru hrakin. Segir í henni að umrætt kvöld hafi verið æfing fyrir sjöundu sýningu þeirra undanfarið eitt og hálft ár. Bára hafi verið með hópnum frá byrjun og hafi því vitað nákvæmlega hvernig sýningin færi fram.  Æfingin hafi helst verið hugsuð fyrir nýliða og því enginn skaði skeður þó Bára hefði sleppt henni til þess að taka upp samtalið á Klaustri.

„Þó við höfum saknað Báru á æfingunni þá var ekki mikill skaði skeður þó svo að hún hafi ekki komið,“ segir í færslunni. „Ekki er um eiginlega 'leiksýningu' að ræða, þó svo að skemmtikraftar kvöldsins séu í karakter, en flestir æfa sinn karakter eða atriði í einrúmi og mætti kalla sýninguna blöndu af kabarett og ljóðaupplestri með leikhúsívafi. Þannig vildi til á endanum að Bára Halldórsdóttir var veik það kvöld sem sýningin var og var önnur spákona fengin í hennar stað á síðustu stundu. Svo þessi rök halda ekki vatni.“