Jónas Garð­ars­son ætlar að hætta sem for­maður Sjó­manna­fé­lags Íslands, að því er fram kemur í yfir­lýs­ingu sem hann hefur sent frá sér og Frétta­blaðið vísar til. Þetta seg­ist hann meðal ann­ars gera til þess að flýta fyrir því að hægt sé að ná víð­tækri sam­stöðu innan Sjó­manna­fé­lags Íslands, en félagið hefur verið mikið til umræðu eftir að stjórn þess ákvað að víkja félags­mann­inum Heið­veigu Maríu Ein­ars­dóttur úr félag­inu fyrir að vega að hags­munum þess. 

„Það verður verk­efni nýrrar for­ystu að sam­eina á nýjan leik þann styrk sem felst í víð­tækri sam­stöðu innan Sjó­manna­fé­lags Íslands og lagt hefur grunn að þeim mikla árangri sem náðst hefur á und­an­förnum árum. Sú vinna þolir enga bið. Til þess að flýta fyrir því ferli hef ég ákveðið að stíga til hliðar sem for­maður félags­ins,“ segir Jónas sem tekur fram að áhlaupi á félagið hafi verið hrundið. 

Jónas talar um „áhlaups­hóp“ sem hafi fundið í honum „snöggan blett á félag­inu og nýtti sér hann út í ystu æsar. Það gerði hann þrátt fyrir að ég hafi strax síð­ast­liðið sumar gefið út yfir­lýs­ingu um að ég myndi ekki bjóða mig fram til áfram­hald­andi for­mennsku í félag­inu.“ Þá segir hann gagn­rýni á félagið hafa snú­ist meira um hans eigin per­sónu en störf hans fyrir félagið. „Minnst af þeirri umfjöllun hefur snú­ist um gagn­rýni á störf mín fyrir félagið heldur ann­ars vegar um launa­kostnað félags­ins vegna mín, sem sagður var um þrefalt hærri en raun er á, og hins vegar upp­rifjun á sorg­legum atburðum í einka­lífi mínu.“

Stundin greindi frá því í þann 9. nóv­em­ber að Jónas væri hæst laun­aði verka­lýðs­leið­togi lands­ins, en hann var með um 1,9 millj­ónir króna í mán­að­ar­laun árið 2016, sam­kvæmt upp­lýs­ingum frá rík­is­skatt­stjóra sem nálg­ast má á vef­síð­unni tekjur.is. Hluti þessar tekna runnu frá Alþjóð­lega flutn­inga­verka­manna­sam­band­inu, ITF, í gegnum Sjó­manna­fé­lag Íslands, til Jónasar sem sinnir starfi umboðs­manns hjá ITF.

Félagið hefur verið mikið í umræð­unni að und­an­förnu, sér­stak­lega eftir að Heiðveig María Ein­ars­dóttir, sjó­maður og við­skipta­lög­fræð­ingur, var gerð brott­ræk þaðan á þeirri for­sendu að hún hefði skaðað hags­muni félags­ins með gagn­rýni sinni. Heiðveig hefur gagn­rýnt stjórn félags­ins harð­lega og meðal ann­ars sakað hana um að hafa breytt lögum þess án heim­ildar. Ein þess­ara laga­breyt­inga fól í sér breyt­ingu á kjör­gengi félags­manna sem þurfa nú að hafa verið skráðir í félagið í þrjú ár til þess að geta boðið sig fram til trún­að­ar­starfa. Heiðveig hefur meðal ann­ars bent á að þessi breyt­ing hafi verið gerð til þess að koma í veg fyrir fram­boð hennar til for­manns.

Stundin greindi nýlega frá því að Sjómanna­fé­lag Íslands hefði greitt tæpar 35 millj­ónir króna í laun og launa­tengd gjöld árið 2015, ef marka má óund­ir­rit­aðan árs­reikn­ing félags­ins fyrir 2015. Þrír starfs­menn félags­ins fengu því sam­an­lagt um þrjá­tíu millj­ónir króna í laun frá félag­inu þetta sama ár, ef frá eru talin launa­tengd gjöld. Þetta þýðir að með­al­tekjur hvers starfs­manns eru um ein milljón króna á mán­uði. Þá greindi Stundin einnig frá því að Hallur Hallsson hefði fengið þrettán millj­ónir króna fyrir að rita sögu félags­ins og 1,2 millj­ónir fyrir ritun upp­lýs­inga­bæk­lings.