WOW air vanti 15 milljarða innspýtingu

Ekkert varð af kaupum Icelandair á WOW air þar sem fjár­þörf þess síð­ara var metin um 15 millj­arðar á þessu ári og næsta. Þetta kemur fram í Við­skipta­Mogg­anum í dag.

Vinna við áreið­an­leika­könnun vegna fyr­ir­hug­aðra kaupa Icelandair á lággjalda­flug­fé­lag­inu leiddi í ljós þessa miklu fjár­þörf næstu miss­era. Sviðs­myndir sýndu að sjóð­streymi félags­ins yrði nei­kvætt allt næsta ár.

Við­skipta­Mogg­inn bar töl­una undir Skúla Mogensen, for­stjóra WOW air, sem sagði hana ekki vera fjarri lagi, en vildi að öðru leyti ekki skýra fjár­þörf­ina.

Undir lok síð­ustu viku birti WOW air upp­gjör vegna fyrstu 9 mán­uða árs­ins. Kom fram að tap félags­ins hafi numið 4,2 millj­örðum króna á tíma­bil­inu. Þá hefur Skúli sagt að fjórði árs­fjórð­ungur verði verri en búist var við vegna nei­kvæðrar umræðu um flug­fé­lagið und­an­farna mán­uði.

Í til­kynn­ingu í gær kom fram að vilji væri fyrir hendi hjá báðum aðilum að ljúka kaupum Indigo Partners á WOW air sem fyrst.