Sigmundur Davíð Gunnlaugsson, Gunnar Bragi Sveinsson og Bergþór Ólason eru ofbeldismenn sem eiga ekki að koma nálægt stjórn landsins. Þetta sagði Lilja Alfreðsdóttir menntamálaráðherra í Kastljósi í kvöld. Þingmennirnir ræddu með ógeðfelldum og klámfengnum hætti um Lilju á Klaustri bar þann 20. nóvember. 

„Ég upplifi þetta sem algjört ofbeldi. Þeir eru ofbeldismenn. Ég segi bara að þetta er alveg skýrt í mínum huga. Ofbeldismenn hafa ekki dagskrárvald í íslensku samfélagi,“ sagði Lilja sem áttaði sig ekki á því hversu mikið málið hefði fengið á hana fyrr en hún sá mynd sem einhver hafði deilt af Bergþóri á Facebook. „Þegar ég sá myndina, mér brá. Mér fannst bara óþægilegt að sjá andlitið á honum. Þá áttaði ég mig á því að ég hafði orðið fyrir stórkostlegri árás. Ég sætti mig ekki við það.“

Hún sagði viðbrögð þremenningana í kjölfar uppljóstranana sýna virðingarleysi. Það hafi verið önnur vonbrigði að sjá hvernig þeir tækju ekki ábyrgð á því sem þeir hefðu sagt. „Mér finnst þeir ekki átta sig á alvarleika málsins. Ég held að sterkur einstaklingur hefði iðrast, hann hefði borið ábyrgð á því sem hann hefði sagt. Hann hefði gengið fram af meiri myndugleika.“ Þá sagði hún að enginn af þremeningunum hefði hringt í hana til þess að biðja hana afsökunar. „Þeir hafa ekki sett sig símleiðis í samband við mig, ekkert af þessu fólki.“

Lilja viðurkenndi að hún muni eiga erfitt með að mæta þremenningunum í þinginu en hún telur að þeir verði hér eftir hunsaðir í störfum þingsins. „Þeir eiga ekki að hafa þetta dagskrárvald. Þeir stýra okkur ekki. Þetta er ofbeldi og ég ætla, þó að þetta fái á mig, ég held áfram og allar aðrar konur og allir þeir sem lent hafa í þessu,“ sagði Lilja sem ítrekaði oftar en einu sinni að hún liti á þessa menn sem ofbeldismenn sem hefðu beitt hana og fleiri konur ofbeldi, og að það væri óafsakanlegt.

„Ég viðurkenni það líka að ég bognaði en ég ætla ekki að láta þetta brjóta mig. Ég ætla að halda áfram að sinna mínum störfum og skyldum. Þetta fær mig bara enn frekar að vera mjög ákveðin í því sem ég er að gera og hrinda framfaramálum af stað,“ sagði Lilja sem tók fram að hún hefði fengið gríðarlega mikinn stuðning frá samráðherrum og þinginu. „En ég vil líka að það sé alveg skýrt, þetta er óboðlegt, þetta er óafsakanlegt og við viljum ekki að íslensku samfélagi sé stýrt af svona fólki.“