Fimm þingmenn Sjálfstæðisflokksins auk þingmanns Flokks fólksins hafa lagt fram frumvarp til breytinga á náttúruverndarlögum þess efnis að fleygi fólk rusli á almannafæri varði það sektum að lágmarki 100 þúsund krónum. Í greinargerð er bent á að erlendis sé víða þekkt að háar sektir liggi við slíku framferði.

Umrætt frumvarp hefur í tvígang verið flutt áður en ekki náð fram að ganga, fyrst árið 2014 og síðan árið 2015. Fyrsti flutningsmaður frumvarpið þá var Guðlaugur Þór Þórðarson, núverandi utanríkisráðherra. Nú hefur Ásmundur Friðriksson, samflokksmaður Guðlaugs Þórs í Sjálfstæðisflokknum, tekið málið upp á sína arma og flytur hann það í óbreyttri mynd ásamt meðflutningsmönnum sínum.

Frumvarpið gerir ráð fyrir að við náttúruverndalög bætist málsgrein þar sem segir að öllum sem fari um hálendið eða þjóðvegi landsins sé óheimilt að henda rusli á almannafæri. Brot á því ákvæði varði sektum að lágmarki 100.000 krónum.