Rauði krossinn gerir verulegar athugasemdir við málflutning velferðarráðuneytisins í fréttatilkynningu um frestun á útboði vegna kaupa á sjúkrabílum. Meðal annars er því mótmælt, sem fullyrt er í tilkynningu ráðuneytisins, að ríkið hafi staðið straum af kaupum á sjúkrabílum. Þá geti ríkið ekki slegið eign sinni á fjármuni Rauða krossins með því að krefjast þess að eignarhald sjúkrabifreiða færist til ríkisins. Óumdeilt sé að Rauði krossinn sé eigandi sjúkrabíla.

Á vef velferðarráðuneytisins í gær birtist frétttilkynning þar sem kom fram að heilbrigðisráðherra hefði fallist á þá ákvörðun Sjúkratrygginga Íslands og Ríkiskaupa að fresta skuli opnun útboðs vegna kaupa á sjúkrabílum um fjóra mánuði. Rauði korssinn hafit annast rekstur sjúkrabíla fyrir hið opinbera frá því að samningur þess efnis tók gildi 1. janúar 1998. Samningur um slíkt hafi hins vegar runnið út í lok árs 2015 og hafi viðræður um nýjan samning staðið síðan.

Í tilkynningu ráðuneytisins kemur einnig fram að ágreiningur hafi verið milli Rauða krossins og ráðuneytisins um eignarhald á sjúkrabílum en ríkið hafi staðið straum af kaupum nýrra bíla að stærstum hluta þó eignarhaldið hafi verið Rauða krossins.

Þessu mótmælir Rauði krossinn og segir að enginn ágreiningur sé uppi um eignarhald sjúkrabíla, enda sé skýrt kveðið á um það að Rauði krossinn sé eigandi þeirra. Þá sé það röng fullyrðing að ríkið hafi staðið staum af kaupum sjúkrabíla því hið rétta sé að framlag ríkisins fari til reksturs Sjúkrabílasjóðs. Allar rekstrartekjur sjóðsins, þar með talið framlög frá Rauða krossinum og notendum fari til rekstrar bílaflotans og einnig til fjárfestinga í bílum og búnaði. Við stofnun sjóðsins árið 1998 hafi Rauði krossinn lagt mikil verðmæti inn í hann, meðal annars um 70 sjúkrabíla og búnað. Haustið 2016 hafi ríkið og Rauði krosinn verið búin að koma sér saman um nýjan samning byggðan á óbreyttum forsendum en þá hafi verlferðarráðuneytið sett óvænt og einhliða fram þá kröfu að eignarhald sjúkrabíla skyldi færast til ríkisins. Það hafi verið gert án skýringa og án viðræðna um uppgjör við Rauða krossinn. „Ríkið getur ekki slegið eign sinni á fjármuni Rauða krossins því skýrt er kveðið á um það í samningum að Rauði krossinn sé eigandi bílanna,“ segir í tilkynningu frá Rauða krossinum.

Í tilkynningunni segir enn fremur að Rauði krossinn vilji halda rekstri sjúkrabíla áfram, líkt og hann hafi gert undanfarin 92 ár, en heilbrigðisráðherra hafi tekið ákvörðun um að færa reksturinn frá félaginu og til ríkisins.