Útlit fyrir að ríkið láni Íslandspósti 500 milljónir

Útlit er fyrir að ríkið veiti Íslands­pósti allt að 500 millj­óna króna lán vegna lausa­fjár­vanda og ófjár­magn­aðs kostn­aðar við alþjón­ustu. Málið hefur verið rætt í rík­is­stjórn sam­kvæmt heim­ildum Stund­ar­innar og kynnt fjár­laga­nefnd Alþingis. Má ætla að heim­ild til lán­veit­ing­ar­innar rati inn í fjár­auka­lög yfir­stand­andi árs. 

Nýlega birti Íslands­póstur hálfs­árs­upp­gjör þar sem fram kom að fyr­ir­tækið hefði tapað 161,2 millj­ónum á fyrri helm­ingi árs­ins. Er áætlað að tekjur fyr­ir­tæk­is­ins drag­ist saman um hátt í 400 millj­ónir á þessu ári vegna fækk­unar bréf­send­inga. Ófjár­magn­aður kostn­aður vegna svo­kall­aðrar alþjón­ustu Íslands­pósts var um 600 millj­ónir króna í fyrra og er reiknað með að hann nemi um 700 millj­ónum árið 2018.

Ráð­gjaf­ar­fyr­ir­tækið Copenhagen Economics vann skýrslu fyrir Íslands­póst í apríl síð­ast­liðnum um þær fjár­hags­legu byrðar sem fylgja alþjón­ustu­skyld­unni. Slík skylda er lögð á póst­fyr­ir­tæki um allan heim til að tryggja að öllum borg­urum sé veitt grunn­póst­þjón­usta á jafn­rétt­is­grund­velli. Felur alþjón­ustu­skyldan í sér ýmsar kröfur, t.d. skyldu til að safna saman og flytja ákveðnar teg­undir af pósti, flytja póst ákveðið marga daga í viku, tryggja að verð sé við­ráð­an­legt og sam­ræmt og að póstur ber­ist innan til­tek­ins tíma­frests frá póst­lagn­ingu.

Fram kom í til­kynn­ingu frá Íslands­pósti vegna afkomu fyr­ir­tæk­is­ins á fyrstu sex mán­uðum árs­ins að stjórn­endur fyr­ir­tæk­is­ins ynnu nú að því „í sam­vinnu við stjórn­völd að leita leiða til að tryggja fjár­mögnun alþjón­ust­unnar og laga hana að breyttum for­send­um“. Samkvæmt heim­ildum Stund­ar­innar er áformað að mæta lausa­fjár­þörf­inni með því að rík­is­sjóður veiti allt að 500 millj­óna króna lán til allt að 12 mán­aða. 

Íslands­póstur er í eigu rík­is­ins og er Ísland eina landið á Evrópska efna­hags­svæð­inu þar sem einka­réttur á póst­þjón­ustu hefur ekki verið felldur niður. Í fyr­ir­liggj­andi frum­varps­drögum Sigurðar Inga Jóhanns­sonar, sam­göngu- og sveit­ar­stjórn­ar­ráð­herra, er lagt til að einka­réttur rík­is­ins verði afnum­inn og alpóst­þjón­usta veitt á mark­aðs­legum for­sendum í sam­ræmi við þriðju póst­til­skipun Evr­ópu­sam­bands­ins.

Stundin hefur óskað eftir ítar­legri upp­lýs­ingum um málið frá fjár­mála­ráðu­neyt­inu og mun upp­færa frétt­ina eftir að þær ber­ast.