Utøya 22. júlí

Hvar? Bíó Paradís
Hvenær? Er í sýningu.
Aðgangseyrir: 1.600 kr.

Þann 22. júlí 2011 voru um 650 ungmenni í pólitískum sumarbúðum á eyju fyrir utan Ósló þegar vopnaður kristinn hægrisinnaður hryðjuverkamaður réðst á þau. Í þessari mynd er fylgst með hinni 18 ára skálduðu persónu, Kaja, en myndin gerist í rauntíma.

Annað rými

Hvar? Nýlistasafnið
Hvenær? 6. september–28. október
Aðgangseyrir: Ókeypis!

Verk Eyglóar Harðardóttir á sýningunni Annað rými eru í stöðugri þróun. Á sinn hátt minnir ferlið á vöxt kristalla, sem kallar á viðbrögð umhverfisins við hverja hreyfingu og viðbótarörvun. Sumum verkanna tekst að ögra rýminu og gefa okkur hugmynd um aðra möguleika, á meðan önnur gefa því ákveðna staðfestingu og auka meðvitund okkar um það.

Allt sem er frábært

Hvar? Borgarleikhúsið
Hvenær? 14.–27. september
Aðgangseyrir: 6.550 kr.

Ungur sonur bregst við myrkum hugsunum móður sinnar með því að búa til lista yfir allt sem er gott í heiminum og gerir lífið þess virði að lifa. Tuttugu árum síðar er listinn enn að lengjast, lifandi áminning um að gleði er ekki síst að finna í því sem virðist léttvægt. Valur Freyr Einarsson stendur einn á sviðinu í þessum einleik.

Ronja Ræningjadóttir

Hvar? Þjóðleikhúsið
Hvenær? 15. september–30. desember
Aðgangseyrir: 4.500 kr.

Ronja Ræningjadóttir eftir Astrid Lindgren er ein af mikilvægustu barnabókum heimsins, en þessi norræna menningargersemi ratar á stóra svið Þjóðleikhússins. Salka Sól fer með hlutverk Ronju, en einnig koma fram Sigurður Þór Óskarsson, Örn Árnason, Vigdís Hrefna Pálsdóttir, Edda Björgvinsdóttir og fleiri stjörnur.

Midgard 2018

Hvar? Laugardalshöll
Hvenær? 15.–16. september
Aðgangseyrir: 8.000 kr.

Hingað til hafa einstaklingar þurft að herja á erlenda grundu til að sækja ráðstefnur um myndasögur, borðspil og önnur nördaleg áhugamál, en í ár hefur hópur slíkra einstaklinga sameinað krafta sína til að halda Midgard-ráðstefnuna. Haldin verður búningakeppni og keppnir í borð- og herspilum, auk margra fyrirlestra og námskeiða.

Skátar, bagdad brothers, Man Kind

Hvar? Húrra
Hvenær? 19. september kl. 21.00

Ærslafullu strákarnir í Skátum hafa snúið aftur til leiks eftir langt hlé og eru farnir að troða upp úr á ný. Búast má við því að þurfa að mæta í dansskónum, þar sem að með þeim spila nostalgíu-poppararnir bagdad brothers og rokkararnir í Man Kind.