Hag­vöxtur verður minni næstu tvö ár, sam­kvæmt þjóð­hags­spá Seðla­bank­ans sem birt var í dag. Verð­bólga var 2,3% á öðrum fjórð­ungi þessa árs og hafa verð­bólgu­horfur auk­ist umfram vænt­ingar. Pen­inga­stefnu­nefnd ákvað að halda stýri­vöxtum óbreyttum, en seg­ist til­búin til að hækka þá. Verði það þá í höndum aðila á vinnu­mark­aði og stjórn­valda að hemja atvinnu­leysi með kjara­samn­ingum og rík­is­fjár­mála­stefnu.

„Pen­inga­stefnu­nefnd ítrekar að hún hefur bæði vilja og þau tæki sem þarf til að halda verð­bólgu við mark­mið til lengri tíma litið,“ segir í yfir­lýs­ingu pen­inga­stefnu­nefndar. „Haldi verð­bólgu­vænt­ingar áfram að hækka og fest­ist í sessi umfram mark­mið mun það kalla á harð­ara taum­hald pen­inga­stefn­unnar. Aðrar ákvarð­anir, einkum á vinnu­mark­aði og í rík­is­fjár­málum, hafa þá áhrif á hversu mik­ill fórn­ar­kostn­aður verður í lægra atvinnustigi.“

Hagvöxtur minni næstu ár

Í rit­inu Pen­inga­mál, sem Seðla­bank­inn birti sam­hliða vaxta­á­kvörðun, kemur fram að ferða­þjón­usta muni vaxa hægar í ár en spáð var. Töluvert meiri vöxtur hefur þó orðið í útflutn­ingi sjáv­ar­af­urða. „Horfur eru því á meiri vexti útflutn­ings sem vegur á móti lak­ari horfum um þróun við­skipta­kjara,“ segir í rit­inu. „Talið er að hag­vöxtur verði 3,6% í ár eins og í fyrra.“

Þá spáir bank­inn því að á næstu tveimur árum hægi á hag­vexti og að hann verði 2,7% á næsta ári en auk­ist lít­il­lega árið 2020 og verði 3%. „Áfram eru horfur á að dragi úr hag­vexti með hæg­ari vexti útflutn­ings og inn­lendrar eft­ir­spurnar. Þróun íbúða­verðs og vís­bend­ingar af vinnu­mark­aði benda í sömu átt,“ segir í yfir­lýs­ingu pen­inga­stefnu­nefndar.