Losun gróðurhúsalofttegunda jókst um 13,2% í flugi til og frá Íslandi á milli áranna 2016 og 2017. Losun í iðnaði jókst lítillega, eða um 2,8%. Þetta kemur fram í tilkynningu frá Umhverfisstofnun í dag.

Upplýsingarnar byggja á uppgjöri á viðskiptakerfi ESB með losunarheimildir. Alls gerðu fimm íslenskir flugrekendur upp heimildir sínar og bar Icelandair ábyrgð á meira en helmingi losunarinnar. Losun WOW Air jókst einnig nokkuð á milli ára. Heildarlosun í flugi sem fellur undir kerfið var 813.745 tonn CO2 ígilda, en í iðnaði var losunin 1.831.667 tonn af CO2 ígildum. Einungis er um að ræða losun vegna flugs innan EES og er Ameríkuflug ekki innan gildissviðs kerfisins.

Losun gróðurhúsalofttegundaFlugiðnaðurinn á Íslandi er ábyrgur fyrir sífellt meiri losun gróðurhúsalofttegunda.

Mynd: Umhverfisstofnun

Viðskiptakerfi ESB með losunarheimildir gróðurhúsalofttegunda gegna lykilhlutverki í aðgerðum Evrópusambandins gegn loftslagsbreytingum. Rekstraraðilum er úthlutað losunarheimildum, en það sem flugrekendur og rekstraraðilar losa umfram endurgjaldslausar losunarheimildir þurfa þeir að kaupa heimildir á markaði og er kerfinu þannig ætlað að vera hvati til að draga úr losun gróðurhúsalofttegunda.