Nefnd um endurskoðun tekjuskatts, sem Axel Hall hagfræðingur stýrði fyrir hönd fjármála- og efnahagsráðuneytisins í tíð síðustu ríkisstjórnar, vann tillögur um flatara skattkerfi með færri skattþrepum. Lægsta skattprósentan mundi lækka en persónuafsláttur hækka samkvæmt tillögunum, en þær eru byggðar á hugmyndum Alþjóðagjaldeyrissjóðsins. Hærra skattþrepið mundi lækka úr 46,24% í 43%.

Ný nefnd um sama mál var skipuð af núverandi fjármála- og efnahagsráðherra, Bjarna Benediktssyni, og er Axel aftur formaður. Hann kynnti hugmyndir fyrri nefndarinnar fyrir hönd ráðuneytisins á fundi stjórnvalda og aðila vinnumarkaðarins 24. maí síðastliðinn og voru fundargögn birt á vef forsætisráðuneytisins í dag.

Hugmyndirnar snúa að því að auka jöfnuð án þess að draga úr hvata til vinnu. Samkvæmt þeim munu ráðstöfunartekjur fólks með allt að 3,6 milljónir króna í árstekjur aukast, en lækka lítillega hjá þeim sem eru með á milli 3,6 og 5 milljónir króna á ári. Ráðstöfunartekjur fólks með yfir 5 milljónir á ári munu einnig aukast.

Samkvæmt þessu mun persónuafsláttur hækka verulega, en verða skerðanlegur. Hann mun fara þangað sem „þörfin er mest“ samkvæmt kynningu ráðuneytisins. Stærri hluti skattgreiðenda mun þannig verða með engan persónuafslátt en lægri skattprósentu. Tekjuskattskerfið verði þannig „flatara“.

Kerfið felur í sér háar tekjutengingar barnabóta, hærri grunnbætur og þök á greiðslur fyrir fjölda barna. Þá eru vaxtabætur afnumdar með öllu.

Mynd: Nefnd um endurskoðun tekjuskatts

Verkalýðshreyfingin vill þrepaskipt kerfi frekar en flatt

Á sama fundi kynnti Gylfi Arnbjörnsson, forseti ASÍ, útreikninga á skattbyrði launafólks. Í erindi hans kom fram að skattbyrði hafi aukist mikið á síðustu áratugum, sér í lagi hjá tekjulægstu hópunum. Ástæður þess séu að persónuafsláttur hafi ekki haldið í við launaþróun, vaxtabóta- og barnabótakerfin hafi veikst verulega og stuðningur við leigjendur hafi rýrnað. Lagði ASÍ til að skattþrepum yrði fjölgað og hátekjuskattur yrði settur á ofurlaun. Skattkerfið verði þannig að styðja við markmið kjarasamninga um bætt kjör lægst launuðu hópanna.

Þá lagði BSRB fram minnisblað þar sem stuðningur félagsins við þrepaskipt skattkerfi var ítrekaður. „Reka á skattkerfið og um leið velferðarkerfi landsins með því hugarfari að fólk greiði inn eftir efnum og taki út eftir þörfum,“ segir í minnisblaðinu. „Mikilvægt er að þær breytingar sem fyrirhugað er að gera á skattkerfinu komi helst þeim tekjulægstu til góða.“