Hlutur fyrirtækja sem leigusalar á leigumarkaði hefur farið verulega vaxandi og hefur umfang þeirra á markaðnum tvöfaldast frá árinu 2011. Einstaklingar eru enn sem komið er umsvifamestir á markaðnum en hlutdeild þeirra hefur dregist verulega saman á sama árafjölda.
Þetta kemur fram í gögnum frá Þjóðskrá Íslands sem Íbúðalánasjóður vekur athygli á. Árið 2011 voru 73 prósent íbúðarhúsnæðis sem var í útleigu í eigu einstaklinga. Nú, sjö árum síðar, er það hlutfall komið niður í 57 prósent. Fyrirtæki áttu 21 prósent leiguhúsnæðis árið 2011 en eiga nú 41 prósent. Hlutfall fjármálastofnana hefur dregist talsvert saman, árið 2011 voru fjármálastofnanir 7 prósent leigusala en eru nú 2 prósent.
Gögn Þjóðskrár ná þó ekki til allra leigusamninga. Þannig var samningum um félagslegar íbúðir, samningum þar sem herbergjafjöldi er óþekktur og samningum þar sem aðeins hluti íbúðar var í útleigu á tímabilinum sem er undir fyrir árið 2018 sleppt. Úrvinnslan fyrir árið 2018 byggir á 5.622 leigusamningum sem þinglýst var á tímabilinu 30. júní til og með 31. júlí 2018.
Í síðustu mánaðarskýrslu Íbúðalánasjóðs kom fram að hlutdeild fyrirtækja í íbúðakaupum fer minnkandi. Hlutdeild fyrirtækja sem leigusala tók stökk milli áranna 2016 og 2017 þegar hún fór úr 31 prósenti í 40 prósent. Íbúðakaup fyrirtækja höfðu þó áður aukist, sérstaklega í Reykjavík, en milli áranna 2013 og 2017 stóðu fyrirtæki á bak við 17 prósent allra íbúðakaupa á því svæði. Á fyrri hluta þessa árs var það hlutfall hins vegar ekki nema um 10 prósent.
Athugasemdir