Áratugur af sirkus

Hvar? Vatnsmýrinni og Akureyri
Hvenær? 13. júlí til 5. ágúst
Aðgangseyrir: 3.000 kr.

Sirkus Íslands hefur haldið sýningar í áratug og heldur upp á það með sérstakri sýningu þar sem fyrirfinnst bæði nýtt efni og eldra. Þessi litríka fjölskyldusýning er uppfull af fimleikum á jörðu og í lofti, trúðum og fleiru. Einnig býður leikhópurinn upp á aðra sýningu sem kallast Skinnsemi, en hún er aðeins ætluð fullorðnum.

Draumareglan & Prófessjónal Amatör

Hvar? Kling & Bang
Hvenær? Til 19. ágúst
Aðgangseyrir: Ókeypis!

Tvær ólíkar sýningar eru í gangi í Kling & Bang. „Draumareglan“ er sýning Fritz Hendriks unnin undir áhrifum hugmynda skálduðu persónunnar „Fræðimannsins“ um mikilvægi stöðugrar svefnrútínu. Verkin samanstanda af innsetningum, málverkum, skúlptúrum, ljósmyndum og vídeó. „Prófessjónal Amatör“ er hópsýning sem kannar snertifleti og þróun menningar og myndlistar, viðvaninga og fagmanna.

Aron Can

Hvar? Húrra
Hvenær? 14. júlí kl. 21.00
Aðgangseyrir: 1.500 kr.

Ljúfi rapparinn Aron Can hefur haldið tónleika á öllum helstu skemmtistöðum landsins og víðar, en í febrúar skrifaði hann undir samning hjá Sony Music og munu silkisléttu tónar hans því dreifast út fyrir landsteinana. Hann gaf nýlega út plötuna „Trúpíter“ og mun eflaust spila meginhluta af henni á þessum tónleikum.

Lífsblómið

Hvar? Listasafn Íslands
Hvenær? 17. júlí–16. desember
Aðgangseyrir: 1.900 kr.

Titill sýningarinnar er sóttur í skáldsögu Halldórs Laxness, „Sjálfstætt fólk“, en eins og bókin fjallar þessi sýning um hina djúpu þrá eftir sjálfstæði. Hún fjallar einnig um það hversu dýrmætt en um leið viðkvæmt fullveldið er, og á sérstaklega við á 100 ára afmæli fullveldis Íslands. Sýningin samanstendur af ýmsum handritum, skjölum og myndlistarverkum.

LungA 2018

Hvar? Seyðisfjörður
Hvenær? 15.–22. júlí
Aðgangseyrir: 10.900 kr.

Uppskeruhátíð ungra listamanna rennur í garð þessa viku, en þar er að sjá margar og mismunandi myndlistarsýningar sem margar hverjar verða til í þessari viku. Á föstudag og laugardaginn koma síðan fram ýmsar hljómsveitir og listamenn eins og Páll Óskar, Sykur, Reykjavíkurdætur og hin bandaríska Princess Nokia.

Dirty Dancing föstudagspartísýning

Hvar? Bíó Paradís
Hvenær? 27. júlí kl. 20.00
Aðgangseyrir: 1.600 kr.

Dansepíkin „Dirty Dancing“ segir frá sumarferð 1963 í Bandaríkjunum þar sem hin 17 ára Baby, leikin af Jennifer Grey, kemst í kynni við atvinnudansara sem dansa fyrir gesti. Þegar einn dansarinn veikist þarf hún að hlaupa í skarðið og kynnist þá betur mótdansara sínum, Johnny, sem er leikinn af Patrick Swayze, en þau verða ástfangin.

Misþyrming, World Narcosis, Alvia Islandia

Hvar? Húrra
Hvenær? 27. júlí kl. 21.00
Aðgangseyrir: 1.500 kr.

Misþyrming er ein af hljómsveitunum sem kom Íslandi á kortið í svartmálmssheiminum, en plata þeirra, „Söngvar elds og óreiðu“, hlaut einróma lof gagnrýnenda og spekinga stefnunnar. Önnur plata þeirra, „Algleymi“, hefur verið lengi í þróun, en það styttist vonandi í hana. Með Misþyrmingu spilar pönksveitin World Narcosis og rapparinn Alvia Islandia.

Bræðslan 2018

Hvar? Borgarfirði eystra
Hvenær? 28. júlí kl. 19.00
Aðgangseyrir: 9.300 kr.

Fjórtánda árið í röð taka Borgfirðingar sig til og breyta gömlu síldarbræðslunni í tónleikasal þar sem margar landsþekktar hljómsveitir spila á Bræðslunni. Fram koma til dæmis rapparinn Emmsjé Gauti, poppsveitin Between Mountains og rokksveitin Agent Fresco. Tjaldsvæði stendur gestum til boða eftir tónleikana.