Þingmenn Sjálfstæðisflokksins sátu ýmist hjá eða greiddu atkvæði gegn því að utanríkisráðherra yrði gert að taka saman skýrslu um framkvæmd alþjóðlegra skuldbindinga er varða flutning á vopnum. Greidd voru atkvæði á Alþingi í dag um hvort heimilt væri að kalla eftir umræddri skýrslu, en áður hafði atkvæðagreiðslunni verið frestað síðastliðinn mánudag.

Rósa Björk Brynjólfsdóttir, þingkona Vinstri grænna, er fyrsti flutningsmaður að beiðninni en meðflutningsmenn hennar eru úr öllum stjórnarsandstöðuflokkunum. Beiðnin var lögð fram í kjölfar umfjöllunar í fréttaskýringaþættinum Kveik 27. febrúar síðastliðinn og fundar utanríkismálanefndar sem haldinn var eftir þann þátt. Á fundinum kom fram að íslenska ríkið hefði „ítrekað veitt íslensku flugfyrirtæki undanþágur til flutninga á vopnum sem grunur leikur á að gætu endað á svæðum sem bannað er að flytja vopn til í samræmi við þær alþjóðaskuldbindingar sem Ísland hefur gengist undir. Það er því talið nauðsynlegt að kalla eftir skýrslu frá utanríkisráðherra þar sem fram kemur hvaða reglur gilda og hvaða verklag er viðhaft innan utanríkisráðuneytisins, og annarra ráðuneyta og undirstofnana, þegar Ísland undirgengst og framfylgir alþjóðasamningum er varða bann við flutningum á tilteknum vopnum til tiltekinna átakasvæða í heiminum,“ að því er segir í greinargerð með skýrslubeiðninni.

Þingmenn allra flokka nema Sjálfstæðisflokks samþykkir

Atkvæðagreiðsla um hvort leyfa ætti beiðni um að skýrslan yrði gerð var boðuð síðastliðinn mánudag en var þá frestað eftir að bréf hafði borist frá utanríkisráðherra þar sem því var lýst yfir að skýrslubeiðnin beindist að hluta til að þáttum sem væru á verksviði annars ráðhera. Steingrímur J. Sigfússon, forseti Alþingis, tilkynnti í dag að hann hefði kannað málið og að í skýrslubeiðninni væri óskað eftir að fjallað yrði um atriði sem féllu undir málefnasvið utanríkisráðherra. Því væri óumdeilt að hún teldist þingtæk og heimilaði Steingrímur atkvæðagreiðslu um hana.

Kom því skýrslubeiðnin til atkvæða. Féllu atkvæði svo að Óli Björn Kárason, Páll Magnússon og Vilhjálmur Árnason, allt þingmenn Sjálfstæðisflokksins greiddu atkvæði gegn því að skýrslubeiðnin yrði heimiluð. Níu aðrir þingmenn, allir úr Sjálfstæðisflokki, sátu hjá við atkvæðagreiðsluna. Skýrslubeiðnin var hins vegar samþykkt með 38 atkvæðum þingmanna úr öllum öðrum flokkum en Sjálfstæðisflokki, þar á meðal atkvæðum þingmanna Vinstri grænna og Framsóknarflokks, sem eru í stjórnarsamstarfi með Sjálfstæðisflokknum.

Birgir Ármannsson, þingmaður Sjálfstæðisflokksins, kom upp í pontu og gerði grein fyrir atkvæði sínu. Sagðist hann myndi sitja hjá við afgreiðslu málsins þar eð hann teldi að kjarni skýrslubeiðnarinnar lyti að málefnum sem heyrðu undir verksvið samgöngu- og sveitarstjórnarráðherra og því væri ekki eðlilegt að utanríkisráðherra svaraði fyrir málið. „Það hefur aldrei verið ágreiningur um að eðlilegt væri að kallað væri eftir upplýsingum af þessu tagi en það hefur hins vegar verið álitamál með hvaða hætti það væri borið fram hér.“