Guðmundur Ingi Guðbrandsson, umhverfis- og auðlindaráðherra, hefur tekið þá ákvörðun að Sif Konráðsdóttir, aðstoðarmaður hans, hætti störfum frá og með deginum í dag. „Ég óska Sif alls hins besta og þakka henni fyrir samstarfið,“ segir í tilkynningu sem Guðmundur Ingi sendi frá sér rétt í þessu. Tilkynnt var um ráðningu Sifjar þann 14. desember síðastlinn.

Sif Konráðsdóttirvar aðstoðarmaður ráðherra í um tvo mánuði.

Mynd: Picasa

Sif Konráðsdóttir var árið 2008 kærð til Lögmannafélagsins fyrir að greiða barni, sem hún starfaði sem réttargæslumaður fyrir, ekki bætur sem dæmdar höfðu verið í Hæstarétti. Kæran var á endanum dregin til baka eftir að annar lögmaður fór í málið og bæturnar fengust greiddar. Guðmundur Ingi sagði í viðtali við Stöð 2  þann 10. febrúar síðastliðinn að hann hefði vitað af málinu áður en Sif var ráðin til starfa og að hann bæri fullt traust til hennar. Hins vegar hafði hann þá ekki fengið staðfest að brotaþolar hafi fengið greitt beint af fjárvörslureikningum.

Þá greindi Fréttablaðið frá því í morgun að umhverfisráðherra hefði til meðferðar mál um friðun jarðar í eigu Sifjar, en friðunin gæti komið í veg fyrir lagningu Blöndulínu 2. Sif hefur barist gegn lagningu línunnar, en hún sagðist í samtali við Fréttablaðið ekki telja Guðmund Inga vanhæfan í málinu.