Skýrsla Hannesar rituð á ensku – „Ótækt“ segir formaður íslenskrar málnefndar

Guðrún Kvaran, for­maður íslenskrar mál­nefndar, segir ótækt að skýrsla sem Hannes Hólm­steinn Giss­ur­ar­son stjórn­mála­fræði­pró­fessor hefur unnið að fyrir fjár­mála- og efna­hags­ráðu­neytið frá 2014 sé skrifuð á ensku. Slíkt gangi í ber­högg við 8. gr. laga um stöðu íslenskrar tungu og íslensks tákn­máls, en þar er skýrt kveðið á um að íslenska sé mál Alþingis, dóm­stóla og stjórn­valda, jafnt ríkis sem sveit­ar­fé­laga. 

Mbl.is greindi frá því í dag að birt­ingu Hann­es­ar­skýrsl­unnar hefði enn einu sinni verið frestað, en sam­kvæmt samn­ingi sem fjár­mála- og efna­hags­ráðu­neytið gerði við Félags­vís­inda­stofnun Háskóla Íslands árið 2014 átti skýrslan að koma út árið 2015. Hannes fær 10 millj­ónir frá hinu opin­bera fyrir skýrslu­gerð­ina, en rann­sókn hans lýtur að „erlendum áhrifa­þáttum banka­hruns­ins“.

Hannes var einn helsti hug­mynda­fræð­ingur Sjálf­stæð­is­flokks­ins fyrir hrun og hefur full­yrt að tvær meg­in­skýr­ing­arnar á íslenska banka­hrun­inu séu þær að Banda­ríkja­menn neit­uðu Íslend­ingum um hjálp á ögur­stundu og að „Bretar stuðl­uðu bein­línis að falli bank­anna“. Þessi sögu­skýr­ing er gjör­ó­lík þeim nið­ur­stöðum sem birt­ust í skýrslu rann­sókn­ar­nefndar Alþingis um aðdrag­anda og orsakir banka­hruns­ins árið 2010, en þar er einkum fundið að við­skipta­háttum og örum útlána­vexti íslensku bank­anna og veiku eft­ir­liti íslenskra stjórn­valda með fjár­mála­kerf­inu. 

Mynd: Vís­inda­vefur HÍ

Skýrsla Hannesar Hólm­steins er um 315 blað­síður að lengd og skrifuð á ensku.

Guðrún Kvaran, for­maður íslenskrar mál­nefndar, bendir á að íslenska er mál stjórn­valda sam­kvæmt lögum. Það gildi um skýrslur sem rit­aðar eru fyrir ráðu­neyti. „Skýrsla á ensku er því ótæk. Hún á að vera skrifuð á íslensku en þýdd yfir á ensku ef þörf krefur,“ segir hún í sam­tali við Stundina.

Þá vísar Guðrún til mál­stefnu Stjórn­ar­ráðs Íslands, en þar kemur fram að allt útgefið efni á vegum stjórn­ar­ráðs­ins skuli vera á íslensku. Þetta eigi meðal ann­ars við um skýrslur, greinar, fréttir og frétta­til­kynn­ingar sem varða mik­il­væga hags­muni Íslands. For­sæt­is­ráð­herra ber ábyrgð á mótun mál­stefn­unnar sam­kvæmt lögum um Stjórn­ar­ráð Íslands og fer for­sæt­is­ráðu­neytið með mál er varða mál­stefn­una sam­kvæmt for­seta­úr­skurði.