Full­trúar allra stjórn­mála­flokka á Alþingi nema Pírata og Flokks fólks­ins hafa farið fram á það við fjár­laga­nefnd að fram­lög hins opin­bera til til stjórn­mála­flokka verði aukin um 362 millj­ónir á næsta ári til við­bótar því sem kveðið er á um í fjár­laga­frum­varpi árs­ins 2018. 

Fjár­hæðin er á við helm­ing þess sem Land­spít­al­inn telur sig vanta á árinu 2018 til að geta haldið sjó í rekstr­inum og veitt sjúk­lingum við­eig­andi þjón­ustu. 

Bent er á það í sam­eig­in­legu erindi til fjár­laga­nefndar frá full­trúum Sjálf­stæð­is­flokks­ins, Vinstri grænna, Fram­sókn­ar­flokks­ins, Sam­fylk­ing­ar­innar, Mið­flokks­ins og Við­reisnar að fram­lög til stjórn­mála­flokka hafa lækkað umtals­vert að raun­virði frá því að lög um fjár­mál stjórn­mála­sam­taka og fram­bjóð­enda tóku gildi árið 2007. 

 „Þetta hefur haft mikil áhrif á starf­semi stjórnmálaflokka til hins verra. Þess vegna erum við und­ir­rituð sammála um nauð­syn þess að leiðrétta framlögin. Að óbreyttu er ekki hægt að upp­fylla mark­mið lag­anna um að ,,auka traust á stjórnmálastarf­semi og efla lýðræðið. Því er hér farið fram á leiðréttingu sam­kvæmt vísitölum frá árinu 2008 sem nemur 362 milljónum til viðbótar lið 05.4 Stjórnsýsla ríkis­fjármála, 09-999 Ýmis­legt nr. 118 í fjárlaga­frum­varp­inu fyrir árið 2018,“ segir í erind­inu.