Áætlun umhverfis- og auð­linda­ráðu­neyt­is­ins um loft­gæði á Íslandi 2018 til 2029 gerir meðal ann­ars ráð fyrir að fjár­mála- og efna­hags­ráðu­neytið vinni að fum­varpi þar sem kveðið verði á um auknar álögur á notkun dísil­véla fyrir árs­lok 2022 í því skyni að draga úr notkun dísil­véla. Einnig vinni sam­göngu- og sveit­ar­stjórn­ar­ráðu­neytið að frum­varpi til laga um breyt­ingu á vega­lögum þar sem kveðið verði á um gjald­töku fyrir árs­lok 2022 vegna nagla­dekkja með það að mark­miði að draga úr notkun þeirra. Þessar aðgerðir eiga að fækka árlegum fjölda daga þar sem svifryk fer yfir skil­greind heilsu­fars­mörk af völdum umferðar. 

Í áætl­un­inni, sem var gefin út 22. nóv­em­ber síð­ast­lið­inn, eru skil­greind þrjú und­ir­mark­mið; að fækka árlegum ótíma­bærum dauðs­föllum af völdum loft­meng­unar á Íslandi úr 80 (árið 2013) í færri en fimm fyrir 2029, að fækka árlegum fjölda daga þar sem svifryk fer yfir skil­greind heilsu­fars­mörk af völdum umferðar úr 7 til 20 skiptum niður í núll skipti fyrir árs­lok 2029 og að árs­með­al­tal brenni­steins­vetnis verði áfram undir skil­greindum mörkum. 

Heild­ar­kostn­aður Umhverf­is­stofn­unar vegna loft­gæða­á­ætl­unar til árs­ins 2029 er áætl­aður tæpar 729 millj­ónir króna og þar af eru tæpar 439 millj­ónir fjár­magn­aðar og þegar gert ráð fyrir í gild­andi fjár­mála­á­ætlun fyrir árin 2018–2022. Ófjár­magn­aður kostn­aður rík­is­sjóðs vegna áætl­un­ar­innar, sem ekki er gert ráð fyrir í fjár­mála­á­ætlun, er áætl­aður um 290 millj­ónir króna. Sá kostn­aður er einkum vegna inn­leið­inga Evr­ópu­gerða á grund­velli skuld­bind­inga EES-samn­ings­ins, eins og segir í áætl­un­inni. 

Eins og Stundin fjall­aði um í vor er loft­mengun af svifryki í Reykja­vík á pari við margar millj­óna­borgir í kringum okkur. Þá fer mengun vegna bíla­um­ferðar vax­andi í mið­borg­inni sam­hliða fjölgun ferða­manna. 

Samkvæmt lögum um holl­ustu­hætti og meng­un­ar­varnir á umhverfis- og auð­linda­ráð­herra að gefa út almenna áætlun um loft­gæði til tólf ára í senn. Í áætl­un­inni eiga að koma fram upp­lýs­ingar um loft­gæði, mæl­an­leg mark­mið, stefnu­mörkun til að bæta loft­gæði og aðgerða- og tíma­á­ætlun. Ákvæðið var lög­bundið árið 2013, en áætl­unin tafð­ist vegna mann­eklu og álags hjá sér­fræð­ingum Umhverf­is­stofn­unar.