Ásmundur Friðriksson, þingmaður Sjálfstæðisflokksins, biðst afsökunar á orðum sínum um kostnað við lögfræðinga Rauða krossins vegna hælisumsókna.
Ásmundur svaraði fyrr í dag spurningu Fréttablaðsins um akstursgreiðslur, sem hann þiggur, með því að kvarta undan að ekki væri verið að fjalla um kostnað vegna hælisumsókna.
„Ég var afar illa fyrirkallaður í viðtali við Fréttablaðið í gær. Viðtal sem ég átti ekki að taka undir þeim kringumstæðum, argur og þreyttur,“ segir Ásmundur, sem neitaði að svara spurningum Fréttablaðsins um akstursgreiðslur sem hann þiggur og spurði á móti: „Þið eruð ekki að spyrja hvað lögfræðingarnir frá Rauða krossinum eru að fá fyrir að senda bréf til innanríkisráðuneytisins vegna hælisleitenda, er það? Þið viljið ekki að þeir missi spón úr aski sínum?“
Ásmundur hefur ítrekað kvartað undan kostnaði við hælisleitendur og hefur verið bent á að tölur og staðreyndir sem hann nefnir í því samhengi standast ekki skoðun.
Stundin fjallaði um akstursgreiðslur til þingmanna í haust og leynd yfir þeim, en þar vildi Ásmundur ekki heldur svara um endurgreiðslur sem rynnu í hans vasa. Enn er leynd yfir greiðslum til þingmanna. Aðeins 16 af 63 þingmönnum svöruðu Stundinni um akstursgreiðslur sínar. Samkvæmt núverandi kerfi geta þingmenn keyrt á eigin bifreiðum um kjördæmi sitt og innheimt kostnað úr ríkissjóði. Kostnaðurinn er meiri en af því að leigja bílaleigubíla, þegar þurfa þykir. Helgi Bernódusson, skrifstofustjóri Alþingis, segir upplýsingarnar einkahagi.
Í kvöld birti Ásmunudur afsökunarbeiðni á Facebook: „Síðustu tveir dagar hafa verið mér þungir í skauti og ég var afar illa fyrirkallaður í viðtali við Fréttablaðið í gær. Viðtal sem ég átti ekki að taka undir þeim kringumstæðum, argur og þreyttur. Það var ávísun á vonda útkomu og ég bið Rauða krossinn og starfsfólk hans afsökunar á orðalagi sem aldrei átti að vera og stofnunin á ekki skilið. Fer ekki í frekari útskýringar á því eða umkenningaleik.
„Í dag steig ég þung skref sem varð að stíga“
Í dag steig ég þung skref sem varð að stíga en vonandi fennir fljótt í þau spor og það birti að nýjum degi með nýjum tækifærum.
Ég er bara mannlegur og breiskur maður sem geri mistök en get líka beðið afsökunar á þeim eins og ég geri nú. Ég vona að það birti á nýjum degi og hann lygni eftir storminn.“
Ásmundur hefur enn ekki svarað um þær akstursgreiðslur sem hann hefur þegið. „Ég er bara mjög duglegur að sækja mitt kjördæmi,“ sagði hann við Stundina í september.
Athugasemdir