Viðræður ríkisins við Þjóðkirkjuna um endurskoðun kirkjujarðasamkomulagsins svokallaða hafa enn engan árangur borið. Endurskoðuninni átti að vera lokið í febrúar 2016. 

„Viðræður fulltrúa ráðuneytisins (fyrst innanríkisráðuneytis og nú dómsmálaráðuneytis) við fulltrúa Þjóðkirkjunnar og með þátttöku fulltrúa forsætisráðuneytis um kirkjujarðasamkomulag og fjárframlög til kirkjunnar hafa staðið yfir um nokkurra missera skeið án þess að leiða til niðurstöðu,“ segir í svari dómsmálaráðuneytisins við fyrirspurn Stundarinnar. Hlé hafi verið gert á viðræðum síðustu mánuði, en ráðgert sé að taka þær aftur upp fljótlega.

Stundin sendi fyrirspurn á dómsmálaráðuneytið þann 6. júlí síðastliðinn, en henni var ekki svarað fyrr en erindi frá úrskurðarnefnd um upplýsingamál barst ráðuneytinu.

Forsagan er sú að við hækkun á rekstrarframlagi til Þjóðkirkjunnar við endurskoðun fjárlaga í nóvember 2015, um 370 milljónir, gerði ríkið það að skilyrði að kirkjan skuldbindi sig til að hefja samningaviðræður um endurskoðun kirkjujarðasamkomulagsins með einföldun og hagræðingu að leiðarljósi. Þessari endurskoðun á fjárhagslegum samskiptum ríkisins …