Ríkisstjóri bandaríska ríkisins Alabama hefur mildað dauðadóm 75 ára gamals manns tveimur dögum fyrir áætlaða aftöku hans og benti á að hann hefði ekki tekið í gikkinn í skotárásinni sem hann var dæmdur fyrir.

Kay Ivey, ríkisstjóri Repúblikanaflokksins, sagði í gær að það væri „ranglátt“ að taka Charles „Sonny“ Burton af lífi, en hann hefur setið á dauðadeild í meira en þrjá áratugi, þar sem hann var fyrir utan bygginguna þegar vitorðsmaður hans skaut mann til bana í vopnuðu ráni.

Burton var einn af sex mönnum sem tóku þátt í ráninu í verslun í borginni Talladega árið 1991 þar sem viðskiptavinur, Doug Battle, var drepinn.

Rannsókn leiddi í ljós að Burton tók ekki í gikkinn sem hleypti af banaskotinu, en hann var dæmdur fyrir morð sem vitorðsmaður og dæmdur til dauða árið 1992.

Byssumaðurinn Derrick DeBruce var einnig dæmdur til dauða, en dómur hans var mildaður í lífstíðarfangelsi án möguleika á reynslulausn. Hann lést síðar í fangelsi.

Ivey mildaði dauðadóm Burtons í lífstíðarfangelsi án möguleika á reynslulausn, aðeins tveimur dögum fyrir áætlaða aftöku hans með köfnunarefnisgasi á fimmtudag.

„Charles Burton skaut ekki fórnarlambið, skipaði ekki byssumanninum að skjóta fórnarlambið og var þegar farinn úr versluninni þegar skotárásin átti sér stað,“ sagði Ivey í yfirlýsingu.

„Ég get ekki með góðri samvisku haldið áfram með aftöku herra Burtons við svo ólíkar aðstæður. Ég tel að það væri ranglátt að einn þátttakandi í þessum glæp yrði tekinn af lífi á meðan þátttakandinn sem tók í gikkinn var það ekki.“

Þetta er í annað sinn sem Ivey náðar fanga á dauðadeild síðan hún tók við embætti ríkisstjóra árið 2017.

Á þeim tíma hefur hún haft yfirumsjón með 25 aftökum.

Mynd: AFP

Fimm fangar á dauðadeild í Bandaríkjunum hafa verið teknir af lífi það sem af er ári, samkvæmt upplýsingamiðstöð um dauðarefsingar (DPIC).

Bandaríkin eru með eitt hæsta hlutfall fangselsaðra einstaklinga af íbúafjölda, eða rúmlega 0,5% allra. Þar eru nú tæpar tvær milljónir manna í fangelsi og til viðbótar um 3,7 milljónir á skilorði eða reynslulausn. 

Bandaríkin eru eina landið á Vesturlöndum sem viðheldur dauðarefsingum. Þar voru 25 líflátnir í fyrra. Meðal annarra ríkja sem tóku flesta fanga af lífi eru Kína, Sádí-Arabía, Afganistan, Norður-Kórea, Írak og Íran.