„Já, ég er veikur, veikur af ást,“ segir forsætisráðherra Spánar, Pedro Sánchez Pérez-Castejón, en þau orð voru höfð eftir honum grein í El Mundo Today þar sem lesa má að hann hafi þurft að bregðast við aðdróttunum hægrisinnaða fjölmiðla sem hafi haldið því á lofti að forsætisráðherrann þjáist af hjarta- og æðasjúkdómi. Þar með var vísað í skilaboð hans á samfélagsmiðlum þar sem hann segir „Forsætisráðherra mun ég vera, en ástfanginn forsætisráðherra,“ og þar segir hann jafnframt: „Eini hjartasjúkdómurinn minn er að ég elska of mikið. Svo mikið að það særir.“
Pedro hikar ekki við að nota kröftug orð, sá evrópski þjóðarleiðtogi sem hefur ekki hikað við að standa upp í hárinu á Trump, staðfastur í þeirri vissu að fylgja beri alþjóðalögum og stofnsáttmála Sameinuðu þjóðanna, um leið og hann fordæmir þjóðarmorði á Gaza, innrás Rússa í Úkraínu og innrás Bandaríkjamanna í Venesúela þar sem þeir fjarlægðu forsetann Nicolas Maduro. Sem og árásir Bandaríkjanna og Ísrael á Íran – eins og frægt er orðið. Nú síðast í janúar sagði hann að réðust Bandaríkjamenn inn í Grænland myndi það gera Putin „að hamingjusamasta náunga í heimi“ – og innrás Rússa þar í landi löglega.
„Forsætisráðherra mun ég vera, en ástfanginn forsætisráðherra“
Nei við brotum á alþjóðalögum
Á fundi í fyrra um Úkraínu, þar sem Pedro Sánchez fundaði ásamt fleiri evrópskum þjóðarleiðtogum, sagði hann: „Að tala um sjálfstæði, og þar með frið í Úkraínu, er að tala um öryggi Evrópu. Friður í Úkraínu og öryggi Evrópu eru tvær hliðar á sama peningi.“
Og þegar Pedro Sánchez skrifar á samfélagsmiðilinn X: „Viðbrögð okkar þá verða að vera viðbrögð okkar nú: NEI við brotum á alþjóðalögum. NEI við þeirri blekkingu að við getum leyst vandamál heimsins með sprengjum. NEI við því að endurtaka mistök fortíðar. NEI VIÐ STRÍÐI“ – þá er það líka í þágu okkar Íslendinga.
Hálfvelgja Evrópuríkja
Í Silfrinu síðastliðinn mánudag, 2. mars, lagði Ingibjörg Sólrún Gísladóttir, sem býr yfir margslunginni innsýn eftir störf sín erlendis á vettvangi alþjóðasamstarfs, áherslu á alþjóðalög þegar hún sagði: „Það sem er auðvitað svolítið dapurlegt að sjá með þessi ríki Evrópu er hvað þau hafa verið svona mikil hálfvelgja í því að standa með alþjóðalögum. Það er eiginlega það sem er dálítið dapurlegt að sjá.“
Og áfram hélt hún: „Það er eins og þau séu öll að gefa það upp á bátinn. Það sjónarmið að það sé mikilvægt að standa við alþjóðalög og alþjóðaskuldbindingar og stofnsáttmála Sameinuðu þjóðanna. Og aðalritari Sameinuðu þjóðanna að verða svolítið eins og hrópandinn í eyðimörkinni þegar hann tala um það.“
Þá nefndi hún að alþjóðlög væru að verða eins og mantra sem þurfi að fara með – „en enginn tekur mark á.“
„Svona vopnlaus smáþjóð eins og Íslendingar verða að halda sig í alþjóðalögin. Það er eina vörn sem að við eigum við þessar aðstæður.“
Alþjóðalög eina vörn smáþjóðar
Eru þjóðarleiðtogar Evrópu upp til hópa of hræddir til að standa með alþjóðalögum og veita Bandaríkjunum mótspyrnu í þessum efnum? Óttast þeir afleiðingarnar, eins og hvert annað ofbeldi, ef þeir dirfast að vera jafn beinskeyttir og spænski forsætisráðherrann á facebook-síðu sinni, þar sem hann skrifar að afstaða ríkisstjórnar Spánar á þessum tímamótum sé skýr, sú sama og hafi verið viðhaldið á Gaza og í Úkraínu.
Ögrar það ýmsum öðrum kollegum hans þegar hann segir NEI við því að brjóta alþjóðalög sem eiga að vernda okkur öll?
Í áðurnefndu Silfri tók Ingibjörg Sólrún það fram að náttúrulega væri ekki auðveld staða að vera talsmaður smáríkis eins og Íslands „í þessum viðsjárverða heimi þegar stórveldin hnykkla vöðva og takast á og eru með einhverja svona söguskoðun sem þau halda á lofti.“
En því næst sagði hún: Samt verð ég að segja að mér finnst ekki vera nógu mikil áhersla hjá henni (utanríkisráðherranum Þorgerði Katrínu) og svosem ekki Evrópuríkjum mörgum hverjum á alþjóðalögin. Svona vopnlaus smáþjóð eins og Íslendingar verða að halda sig í alþjóðalögin. Það er eina vörn sem að við eigum við þessar aðstæður. Og halda bara fast í það sjónarmið. Það skiptir engu máli hver það er sem er að verki, hvort sem það eru Rússar eða Bandaríkjamenn eða Ísrael eða hver sem er, Þjóðverjar eða Frakkar. Við verðum að halda í þetta. Þetta er okkar vörn sem smáþjóðar.“
Bandarískir hermenn banka
Þau orð hennar leiða hugann að orðum Kim Kielsen, forseta grænlenska þingsins og fyrrum forsætisráðherra Grænlands, sem var í viðtali við Heimildina nú í febrúar: „Þið fenguð sjálfstæði árið 1944 en Bandaríkin líta til þess hversu mikið þú getur gert. Þetta sama afl mun gera hið sama við ykkur ef þið segist ætla að vinna með Rússlandi. Daginn eftir banka á dyrnar bandarískir hermenn,“ sagði hann þá – og kjarnar þannig ótta ráðamanna í ástandinu núna – sem hugsanlega eru nú öllu frekar að spá í viðskiptahagsmuni.
Athugasemdir