Verðbólgan á evrusvæðinu lækkaði niður í 1,7% í janúar úr 2% mánuðinn áður, samkvæmt tölum Eurostat yfir samræmda mælingu verðbólgu. 

Minnst var verðbólgan í Frakklandi (0,4%), Danmörku (0,6) og Finnlandi og Ítalíu (1%).

Á sama tíma var verðbólga í Evrópusambandinu öllu að meðaltali 2%.

Samkvæmt sömu mælingu er verðbólga á Íslandi 4,4%, sem er sú mesta á Evrópska efnahagssvæðinu fyrir utan Rúmeníu.

Verðbólga á Íslandi mældist hins vegar 5,2%, samkvæmt mælingu Hagstofunnar, sem er að nokkru frábrugðin samræmdu evrópsku mælingunni. Vísitala neysluverðs hækkaði um tæplega 1% á einum mánuði í síðustu mælingu íslensku Hagstofunnar, sem samsvarar heils árs verðbólgu í sumum framangreindum Evrópulöndum.

Helst er það lækkun orkuverðs sem dregur úr verðbólgu í Evrópu, en á evrusvæðinu hefur matvælaverð hækkað um 2,6% síðastliðið ár en 5,6% á Íslandi.

Aðferð íslensku Hagstofunnar mælir meðal annars húsnæðiskostnað öðruvísi en sú samræmda evrópska.

Talið er ólíklegt að peningastefnunefnd Seðlabanka Íslands lækki stýrivexti sína í næstu viku vegna aukinnar verðbólgu.

Ríkisstjórnin ræddi verðbólguvandann á fundi sínum í morgun. Daði Már Kristófersson fjármálaráðherra sagði í samtali við fréttastofu Sýnar von á aðgerðum ríkisstjórnarinnar í nokkrum liðum til að berjast gegn verðbólgu.