Í janúar innleiddu Hagar, sem reka Bónus, Hagkaup og Eldum rétt, vildarkerfið Takk krónur. Það gengur þannig fyrir sig að fyrir tilteknar vörur geta viðskiptavinir áunnið sér Takk krónur sem hægt er að nýta í verslunum Haga.
Á netinu hefur orðið vart við talsverða gagnrýni á það sem fólki þykir vera „lítill sem enginn afsláttur,“ eins og einn meðlimur hópsins „Vertu á verði - eftirlit með verðlagi“ orðaði það.
Vörurnar kosta fullt verð í búðinni nema fólk sæki sér app og skanni „Takk kort“ í símanum sínum á kassanum. Þá fæst afsláttur af tilteknum „Takk vörum“ sem safnast á aðganginn og hægt er að nýta síðar. Allar upplýsingar um kaupin vistast svo í appinu.
Fjórum dögum eftir að vildarkerfinu var komið á fót var greint frá því að 20 þúsund landsmenn hefðu skráð sig í það. Takk appið var þá efsta á Íslandi í App og Play Store.
Athugasemdir