Kristrún Frostadóttir forsætisráðherra átti í dag vinnufund með Ursulu von der Leyen, forseta framkvæmdastjórnar Evrópusambandsins, þar sem rætt var um stöðu alþjóðamála, öryggismál, efnahags- og tollamál, Evrópska efnahagssvæðið og samstarf Íslands við sambandið.
„Við ræddum meðal annars losunarheimildir í flugi og sérstaka undanþágu Íslands sem rennur út í lok árs,“ segir Kristrún í yfirlýsingu frá Stjórnarráðinu. „Þetta er afar mikilvægt hagsmunamál fyrir íslenska flugrekendur og við áttum uppbyggilegt samtal um hugsanlegar lausnir fyrir Ísland,” segir forsætisráðherra.
Í dag eiga danski og grænlenski utanríkisráðherrann fund með utanríkisráðherra og varaforseta Bandaríkjanna, í skugga hótana Bandaríkjaforseta um að yfirtaka og innlima Grænland.
Kristrún ávarpar það í yfirlýsingunni.
„Öryggis-og varnarmál í álfunni og ekki síst hér á Norðurslóðum eru ofarlega í huga allra og áttum við einnig hreinskiptið samtal um stöðuna eins og hún blasir við núna. Við áréttuðum báðar afdráttarlausan stuðning okkar við Grænland og Danmörku,” segir Kristrún.
„Samskipti ESB og Íslands standa á afar traustum grunni og í ljósi aðstæðna er mikilvægt að halda áfram öflugri hagsmunagæslu við forsvarsmenn framkvæmdastjórnarinnar og aðildarríkja ESB.“
Að sögn Stjórnarráðsins er vinnufundurinn í dag liður í áframhaldandi samtali um samstarf Íslands og ESB en forsætisráðherra átti á síðasta ári tvo fundi með forseta framkvæmdastjórnar ESB, þann fyrri í Brussel í apríl og þann síðari á Íslandi í júlí.
Stefnt er að því að ljúka við að skrifa undir viljayfirlýsingu með ESB um aukið samstarf í varnar- og öryggismálum, samkvæmt orðum Þorgerðar Katrínar Gunnarsdóttur utanríkisráðherra á dögunum. Undirrituninni var hafnað af hálfu Íslands eftir að ESB ákvað að fella EES-ríkin, þar á meðal Ísland og Noreg, undir verndartolla á kísiljárn.
Ekki kemur fram hvort það hafi verið rætt á fundi Kristrúnar og Ursulu.
Í dag hefur verið greint frá því að Danir hafi sent herlið til æfinga á Grænlandi og ætli sér aukna viðveru þar, ásamt því að hafa leitað til Evrópuþjóða um þátttöku í vörnum Grænlands, í kjölfar endurtekinna yfirlýsinga Bandaríkjaforseta um innlimun landsins í Bandaríkin á forsendum þess að öryggi sé ábótavant.
Kristrún sagði í viðtali við Heimildina á föstudag að Íslendingar gætu „treyst á Bandaríkin“ í öryggismálum.
The United Nations recognizes 39 so-called small developing island states. If they were all getting the same privileges as Iceland does the climate will get worse beyond control!