Popúlismi hefur verið áberandi í íslenskum stjórnmálum síðustu ár, en Kristrún Frostadóttir forsætisráðherra segir í viðtali við Heimildina, sem kemur út í dag, að Íslendingar séu enn fremur hófstilltir í alþjóðlegum samanburði. Hún varar þó við orðræðu sem ýtir undir sundrungu, einkum í umræðu um innflytjendur, og segir samstöðu vera helsta styrk smárra samfélaga.
Hún segir umræðuna hafa breyst samhliða hröðum samfélagsbreytingum, sérstaklega eftir aukinn efnahagsvöxt og fjölgun innflytjenda á síðasta áratug. Mikilvægt sé að greina á milli flóttafólks og efnahagslegra innflytjenda og ræða málin af ábyrgð.
„Auðvitað er það mjög neikvæð þróun ef rasismi er farinn að grassera í íslensku samfélagi,“ segir Kristrún og bætir við að stjórnmálamenn verði að takast á við undirliggjandi áskoranir, svo óöryggi festi ekki rætur og óábyrgir aðilar fylli tómarúmið.
Hún segir jafnframt að þrátt fyrir gagnrýni á efnahagsmál Miðflokksins sé mögulegt að finna sameiginlegan grundvöll í útlendingamálum.
„Hvað útlendingamálin varðar, þá er ýmislegt sem við getum náð saman um í útlendingamálum,“ segir Kristrún. „Það þarf ekki annað en að skoða þau mál sem eru að fara í gegnum þingið.“
Hún tekur þó fram að hún hafi gert athugasemdir við tón og framsetningu málflutnings Miðflokksmanna. Að hennar mati sé stundum verið að blanda saman ólíkum málaflokkum, mikilvægt sé að greina skýrt á milli flóttafólks og efnahagslegra innflytjenda til að umræðan verði málefnaleg og ábyrg.
Ítarlegt viðtal við Kristrúnu Frostadóttur má finna í prentútgáfu Heimildarinnar. Þar ræðir hún um um öryggis- og varnarmál, samstarfið við Bandaríkin, útlendingamál og innflutta stéttaskiptingu. Hún segir eðlilegt að það sé ákall eftir endurnýjun í borgarstjórn.
Athugasemdir