„Þetta er stórsigur og varða á leiðinni að því að brotaþolar geti fengið réttlæti í sínum málum. Þarna viðurkennir Mannréttindadómstóllinn að í einu máli að þá hafi lögreglan ekki sinnt skyldum sínum og í rauninni komið í veg fyrir að brotaþoli fái það réttlæti sem hún á skilið,“ segir Drífa Snædal, talskona Stígamóta, við Heimildina. 

Fyrr í dag birtust úrskurðir MDE í málum tveggja kvenna sem kærðu íslenska ríkið fyrir rangláta málsmeðferð í kærum þeirra á brotum í nánu sambandi. Dómstóllinn komst að þeirri niðurstöðu að í máli annarrar þeirra, Maríu Árnadóttur, hefði verið brotið á mannréttindum hennar þegar málið fyrntist í höndum lögreglu.

Sjö önnur mál þar sem konur töldu íslenska ríkið hafa brotið á rétti þeirra til réttlátrar málsmeðferða eru enn á borði MDE. Stígamót sáu um að safna öllum níu kærunum saman sem síðan voru sendar til dómstólsins.