Arna Magnea verðlaunuð fyrir besta leik í aðalhlutverki

Arna Magnea Danks var verð­launuð fyrir besta leik í aðal­hlut­verki, burt­séð frá kyni, á alþjóð­legu kvik­mynda­há­tíð­inni Kashish Pri­de Film Festival á Indland fyrir hlut­verk sitt í Ljós­vík­ingum, sem einnig var valin besta myndin.

The Variety greinir frá þessu og segir að Arna Magnea sé trans kona, þriggja barna móðir, kenn­ari, leik­ari, áhættu­leik­stjóri og skáld. Í sam­tali við The Variety segir hún: „Það er ekki á hverjum degi sem trans kona eins og ég fær verð­laun. Ég vil þakka leik­stjór­anum, öðrum leik­urum og hverju ein­asta þeirra sem tóku þátt í að skapa þetta lista­verk sem er ein­stakt, ekki aðeins fyrir Ísland heldur fyrir heim­inn allan.“

Kvik­myndin Ljós­vík­ingar var frum­sýnd á síð­asta ári en leik­stjóri og hand­rits­höf­undur er Snævar Sölvason. Hún fjallar um æsku­vin­ina Hjalta og Björn sem reka fisk­veit­inga­stað í heimabæ sínum yfir sum­arið. Þegar óvænt tæki­færi gefst til­kynnir Björn vini sínum að hún sé trans kona og muni fram­vegis heita Birna. Breyt­ing­arnar reyna á vin­átt­una og þurfa þau bæði að horfast í augu við lífið á nýjan hátt. 

Ljós­vík­ingar er fyrsta íslenska myndin í fullri lengd þar sem trans kona fer með aðal­hlut­verk. 

Þetta er fjórða mynd Snævars Sölva en hann hefur áður gert mynd­irnar Slæg­inga­meist­ar­arnir, Albatross og Eden.